திருவள்ளூர் நாடாளுமன்றத் தொகுதியில் அதிமுக சார்பில் போட்டியிடும் வேட்பாளர் வேணுகோபாலை ஆதரித்து சமத்துவ மக்கள் கட்சி தலைவர் சரத்குமார் பட்டாபிராம் பகுதியில் பரப்புரை மேற்கொண்டார்.
அப்போது அவர் பேசுகையில், "நாம் அனைவரும் மத்தியில் ஒரு நிலையான வலுவான பெரும்பான்மையான ஆட்சி அமைய ஒற்றுமையுடன் ஒரு அணியாய் அண்ணா திராவிட முன்னேற்ற கழகத்தில் இணைந்து பணியாற்ற வேண்டும்.
தனது சட்டையை தானே கிழித்துக்கொண்டு வெளியே வந்தஎதிர்க்கட்சித் தலைவர் ஸ்டாலின்,சந்தர்ப்பவாத கூட்டணி என்று சொல்லிக்கொண்டிருக்கிறார். சந்தர்ப்பவாத கூட்டணி என்று சொல்கிறாரே... யார் பதவி ஆசையோடு இருக்கிறார் என்று பார்க்க வேண்டும். அப்படி பார்த்தால் திராவிட முன்னேற்ற கழகம்தான் பதவி ஆசையுடன் இருக்கின்றது.
காற்றில்கூட 2ஜி ஸ்பெக்ட்ரம் ஊழலில் ஒரு லட்சத்து எழுபத்து ஆறு ஆயிரம் கோடி ஊழல் செய்து சாதனை செய்தவர்கள் திமுகவில் இருப்பவர்கள்தான்.
காவேரி ஆற்று பிரச்னை இதுவரை தீர்க்கப்படாமல் இருப்பதற்கு காரணம் காங்கிரஸ்தான். ஏனென்றால் கர்நாடகாவில் காங்கிரஸ் ஆட்சிதான் நடைபெற்றுக் கொண்டிருந் போது திமுகவினரால் எந்த ஒரு முயற்சியும் எடுக்கப்படவில்லை.
நமது தொப்புல் கொடி உறவான ஈழத்தமிழர்கள் படுகொலை செய்யப்பட்டு கொண்டிருக்கும்போது திமுகவால் எதுவும் செய்ய முடியவில்லை. ராஜீவ் காந்தி கொலை வழக்கில் பேரறிவாளன் உட்பட ஏழு பேர் விடுதலை செய்வதற்கு ஏன் காங்கிரஸ் கட்சியால் முடியவில்லை.
காங்கிரஸ் தலைவர் ராகுல் காந்தி கேரள மாநிலத்தின் வயநாடு என்ற தொகுதியில் போட்டியிடுவதாக செய்திகள் வந்து கொண்டிருக்கின்றன. கேரளாவில் கம்யூனிஸ்ட்டை எதிர்த்து போட்டியிடுகிறார்; ஆனால் தமிழ்நாட்டில் கம்யூனிஸ்ட் கட்சியுடன் கூட்டணி வைத்திருக்கிறார். வாக்காளர்களே! சிந்தித்துப் பார்க்க வேண்டும் எது சந்தர்ப்பவாத கூட்டணி என்று நீங்கள் எண்ணிப் பார்க்க வேண்டும்" என தெரிவித்தார்.
