திருவள்ளூர் மாவட்டம்: திருத்தணியில் குடியுரிமை திருத்தச் சட்டத்தை ரத்து செய்ய வலியுறுத்தி பள்ளிவாசலில் தொடங்கிய பேரணி கமலா திரையரங்கின் அருகே நிறைவுபெற்றது. அதனைத் தொடர்ந்து ஒருங்கிணைந்த இஸ்லாமிய ஜமாத் சார்பில் கண்டன ஆர்ப்பாட்டம் நடைபெற்றது.
இந்த ஆர்ப்பாட்டத்தில் திருத்தணி, பள்ளிப்பட்டு வட்டாரப் பகுதிகளைச் சேர்ந்த 500க்கும் மேற்பட்ட பள்ளிவாசல்களை சேர்ந்த இஸ்லாமியர்கள் தேசியக் கொடியுடன் ஊர்வலமாக பங்கேற்று மத்திய, மாநில அரசுகளை கண்டித்தும் குடியுரிமை திருத்தச் சட்டத்தை ரத்து செய்யக் கோரியும் கண்டன கோஷங்களை எழுப்பினர்.
திருவள்ளூரில் நடைபெற்ற ஆர்ப்பாட்டம் தருமபுரி மாவட்டம்: மத்திய அரசு சமீபத்தில் நிறைவேற்றிய குடியுரிமை திருத்தச் சட்ட மசோதாவை திரும்பப் பெறக்கோரி தருமபுரி மாவட்டம் பென்னாகரம் பகுதியைச் சேர்ந்த இஸ்லாமியர்கள். விடுதலை சிறுத்தை கட்சியினா் உள்ளிட்ட 17 அமைப்புகளைச் சேர்ந்தவர்கள் பென்னாகரம் அரசு தலைமை மருத்துவமனை அருகிலிருந்து ஊர்வலமாகச் சென்று பென்னாகரம் பேருந்து நிலையம் அருகே ஆர்ப்பாட்டத்தில் ஈடுபட்டனர்.
பேரணியில் ஆண்கள், பெண்கள் குழந்தைகள் வணிகர்கள் என 500க்கும் மேற்பட்டோர் கலந்துகொண்டனர். ஆர்ப்பாட்டத்தின்போது மத்திய அரசுக்கு எதிராக கண்டன கோஷங்களை எழுப்பினர்.
தருமபுரியில் நடைபெற்ற போராட்டம் சேலம் மாவட்டம்: சேலம் மாவட்ட ஆட்சியர் அலுவலகம் முன்பு குடியுரிமை திருத்தச் சட்டத்தைத் திரும்பப் பெற வலியுறுத்தி மாணவர்கள், இளைஞர்கள் கூட்டமைப்பு சார்பில் 100க்கும் மேற்பட்டோர் கண்டன ஆர்ப்பாட்டத்தில் ஈடுபட்டனர்.
சேலம் மாவட்டத்தில் நடைபெற்ற ஆர்ப்பாட்டம் இந்த ஆர்ப்பாட்டத்தில் சிறுவர்கள் தேசத்தலைவர்களான காந்தி, நேரு, பெரியார், பாரதியார் , விடுதலை போராட்ட வீரர்களான, ஜான்சி ராணி, வீரபாண்டிய கட்டபொம்மன், பகத்சிங் ஆகியோர்களின் வேடமணிந்து அனைத்து மதத்தினரையும் பாதிக்கக்கூடிய இந்த திருத்தச் சட்டத்தை திரும்பப் பெற வலியுறுத்தியும் மத்திய அரசுக்கு எதிராக கண்டன கோஷங்களை எழுப்பியும் ஆர்ப்பாட்டம் நடத்தினர்.
இதையும் படிங்க: ஆளுநர் மாளிகை நோக்கி பல்லாயிரக்கணக்கானோர் பேரணி!
