ஊரடங்கு உத்தரவு: எளிமையாக நடைபெற்ற திமுக பிரமுகர் இல்லத் திருமணம்

திருவள்ளூர்: ஊரடங்கு உத்தரவு காரணமாக எளிமையான முறையில் நடைபெற்ற திமுக பிரமுகர் இல்லத் திருமணத்தில் மணமக்கள் சமூக இடைவெளியைக் கடைபிடித்து திருமணம் செய்துகொண்டனர்.

திருவள்ளூர் மாவட்டம், மீஞ்சூரில் ஊரடங்கு உத்தரவு காரணமாக திமுகவின் திருவள்ளூர் வடக்கு மாவட்ட மீனவர் அணி துணை அமைப்பாளர் ஏசுராஜன் கலைமணி இல்லத் திருமண நிகழ்ச்சி மிக எளிமையாக, சமூக இடைவெளியைப் பின்பற்றி நடைபெற்றது.

இத்திருமண வரவேற்புக்கு இரு வீட்டாருக்கும் முகக் கவசம் வழங்கி வரவேற்பு அளிக்கப்பட்டது. மணமக்கள் கெசீன்-சாருலதா ஆகியோர் திமுக மீஞ்சூர் ஒன்றியச் செயலாளர்கள் என். எஸ். கே. ரமேஷ் ராஜ், சுகுமாரன், ஒன்றிய சேர்மன் ரவி ஆகியோர் முன்னிலையில் திருமணம் செய்து கொண்டு, ஆசி பெற்றனர்.

மேலும் இத்திருமணத்தில், மாப்பிள்ளை வீட்டார் சார்பில் 10 பேரும், பெண் வீட்டார் சார்பில் 10 பேரும் கலந்து கொண்டனர். ஊரடங்கு முன்பு மிக பிரமாண்டமான முறையில் நடைபெற இருந்த இத்திருமண விழா, கரோனா தடுப்பு நடவடிக்கையாக 144 தடை உத்தரவைக் கடைபிடித்து வரும் தற்போதைய சூழலில், மிக எளிமையான முறையில் நடைபெற்றது.

இதையும் படிங்க:பள்ளிகள் திறந்து 10 நாள்களுக்குப் பிறகே 10, 12ஆம் தேர்வு நடத்த வேண்டும் - பொதுப்பள்ளிகான மாநில மேடை ஆலோசனை