தனியார் பேருந்தில் கடத்திவரப்பட்ட 4 கிலோ கஞ்சா பறிமுதல்: 4 பேர் கைது!

திருவள்ளூர்: ஆரம்பாக்கம் அருகே தமிழக - ஆந்திர எல்லையில் தனியார் பேருந்தில் சட்டவிரோதமாக கடத்தி வரப்பட்ட 4 கிலோ கஞ்சாவை பறிமுதல் செய்த காவல்துறையினர், இதுதொடர்பாக 4 பேரை கைது செய்துள்ளனர்.

திருவள்ளூர் மாவட்டம் ஆரம்பாக்கம் அருகே எளாவூர் சோதனைச்சாவடியில், கும்மிடிப்பூண்டி சரக காவல் துறையினர் வாகன சோதனையில் ஈடுபட்டிருந்தனர்.

அப்போது, ஆந்திர மாநிலம் நெல்லூரில் இருந்து தமிழ்நாடு நோக்கி வந்த தனியார் பேருந்தை காவல்துறையினர் நிறுத்தி சோதனையிட்டனர். அதில் கஞ்சா கடத்தி வருவது தெரியவந்தது.

இதனையடுத்து கஞ்சா கடத்தலில் ஈடுபட்ட 4 பேரை கைது செய்த காவல்துறையினர், 4 கிலோ கஞ்சாவை பறிமுதல் செய்தனர்.

இதையும் படிங்க:வாட்ஸ்அப்பில் ஆபாசம்... தனிமையில் அத்துமீறல்: ஆசிரியரைக் காக்கத் துடிக்கும் அலுவலர்கள்!