திமுக முன்னாள் மேயர் ஏன் வெட்டிக் கொலை?

திருநெல்வேலி:  திமுக முன்னாள் மேயர் உமா மகேஸ்வரி உட்பட மூன்று பேர் அடையாளம் தெரியாத நபர்களால் படுகொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.

திருநெல்வேலி மாவட்டம், ரெட்டியார்பட்டியைச் சேர்ந்தவர் உமா மகேஸ்வரி. திமுக முன்னாள் மேயரான இவர் தனது கணவருடன் வசித்துவந்தார். இந்நிலையில், நேற்று மாலையில் அவரது வீட்டிற்கு வந்த அடையாளம் தெரியாத நபர்கள் உமா மகேஸ்வரி, அவரது கணவர், பணிப்பெண் ஆகிய மூன்று பேரையும் கண் இமைக்கும் நேரத்தில் வெட்டிக் கொலை செய்துவிட்டு தப்பிச் சென்றனர்.

இது குறித்து தகவலறிந்து சம்பவ இடத்திற்கு வந்த காவல் துறையினர் உடல்களை கைப்பற்றி உடற்கூறு ஆய்விற்காக அரசு மருத்துவமனைக்கு அனுப்பிவைத்துவிட்டு, வழக்குப்பதிவு செய்து விசாரணை மேற்கொண்டுவருகின்றனர்.

இக்கொலை சம்பவம் குறித்து மாவட்ட கண்காணிப்பாளர் பாஸ்கர் செய்தியாளர்களிடம் பேசுகையில்,

'இச்சம்பவத்தில் மூன்று பேர் கொண்ட கும்பல் சம்பவத்தில் ஈடுபட்டிருக்கலாம். மேலும் நகை, பணத்திற்காக இந்தக் கொலை நடந்து இருக்காலம். வீட்டில் நகைகள், மேலும் சில முக்கிய ஆவணங்கள் காணாமல் போயுள்ளன. மூன்று தனிப்படைகள் அமைக்கப்பட்டு விசாரணை நடைபெற்றுவருகிறது' என்றார். இந்தச் சம்பவம் அந்தப் பகுதியில் அதிர்ச்சியை ஏற்படுத்தியுள்ளது.