திருநெல்வேலி:மாண்டஸ் புயல் காரணமாகத் தமிழ்நாடு முழுவதும் பரவலாக மழை பெய்யும் என்ற வானிலை ஆய்வு மையத்தின் அறிக்கையைக் கேட்டு நெல்லை மாவட்டத்தில் பள்ளி மாணவர்கள் பலர் இன்று(டிச.9) தங்களது பள்ளிக்கு விடுமுறை கிடைக்குமா? கிடைக்காதா? என மதில் மேல் பூனை போல் காத்திருந்தனர்.
ஆனால் கடைசி வரை நெல்லை ஆட்சியர் விஷ்ணு பள்ளிக்கு விடுமுறை விடாததால் மாணவர்கள் பெரிதும் ஏமாற்றம் அடைந்தனர் இது அவர்களுக்குச் சற்று அதிர்ச்சியைக் கூட ஏற்படுத்தியது. நெல்லை, தென்காசி, கன்னியாகுமரி, விருதுநகர் மாவட்ட பள்ளிகள் வழக்கம்போல் செயல்படும் என்ற மாவட்ட நிர்வாகத்தின் அறிக்கை செய்தியைத் தொலைக்காட்சியில் பார்த்த மாணவர் ஒருவர் மழலை மொழியில் மழைக்கு விடுமுறை கேட்டு மாவட்ட ஆட்சித் தலைவருக்குக் கோரிக்கை வைத்து வெளியிட்ட வீடியோ இணையதளங்களில் வைரல் ஆகியுள்ளது. அதில் பேசிய சிறுவன், ”டியர் கலெக்டர் சார் திருநெல்வேலி சையிடு மழை பெஞ்சிட்டு இருக்கு நீங்க கொஞ்சம் கருணை காட்டி திசையன்விளை பள்ளிகளுக்கு லீவு கொடுங்க” என பேசியுள்ளார்.