சிக்கிய மணல் கொள்ளையர்கள்

திருநெல்வேலி: வள்ளியூர் அருகே திருட்டுத்தனமாக மணல் கொள்ளையில் ஈடுபட்டவர்கள் காவல் துறையினரால் கைது செய்யப்பட்டனர்.

தமிழ்நாடு முழுவதும் கரோனா வைரஸ் தொற்று பரவுவதால் ஊரடங்கு பிறப்பிக்கப்பட்டுள்ளது. இந்த நிலையில் வள்ளியூர் அருகே உள்ள கேசவநேரியைச் சேர்ந்த முருகன் என்பவர், தனது டிப்பர் லாரியைப் பயன்படுத்தி, மணல் திருட்டில் ஈடுபட்டு வந்துள்ளார்.

இந்நிலையில் நேற்று (மே 5) மாலை திருக்குறுங்குடி அருகே உள்ள நம்பியாற்றில் டிப்பர் லாரியில் முருகனும் அவரது கூட்டாளியும் மணல் அள்ளிக்கொண்டு இருந்துள்ளனர்.

இதனிடையே தகவல் தெரிந்த திருக்குறுங்குடி காவல் துறையினர் சம்பவ இடத்திற்குச் சென்று பார்த்த போது, டிப்பர் லாரியில் மணல் அள்ளிக் கொண்டு இருந்துள்ளனர். இந்த நிலையில் அதனை அள்ளிக் கொண்டிருந்த முருகன் என்பவரைக் கைது செய்ய முற்பட்ட போது, அவர் காவல்துறையினரைப் பார்த்து 'நான் பெருந்தலைவர் மக்கள் கட்சியில் பெரிய பொறுப்பில் இருக்கிறேன். என்னை ஒன்றும் செய்ய முடியாது' என பேசி இருக்கிறார். மேலும் டிப்பர் லாரி முன், உட்கார்ந்து கொண்டு வண்டியை எடுக்க விடாமல் தடுத்துள்ளார்.

அதன்பின்னர் கிராம நிர்வாக அதிகாரி அந்தோணி ஆரோக்கிய ரமேஷ் அளித்த புகாரின் பேரில் முருகன், உடன் மணல் கொள்ளையில் ஈடுபட்ட மாயா என்பவர் மீது வழக்குப்பதிவு செய்யப்பட்டது.

இதில் முருகன் என்பவர் என்.ஆர்.தனபாலன் என்பவர் நடத்தி வரும் பெருந்தலைவர் மக்கள் கட்சியில் கிழக்கு மாவட்டத் தலைவராக இருந்து வருகிறார். இந்தக் கட்சியின் பெயரைப் பயன்படுத்தி, மணல் கொள்ளையில் தொடர்ந்து ஈடுபட்டு வருகிறார்.

மேலும் முருகன் மீது வள்ளியூர், திருக்குறுங்குடி காவல் நிலையங்களில் கொலை முயற்சி வழக்கு, மணல் திருட்டு போன்ற ஏராளமான வழக்குகள் உள்ளன.