நெல்லை:மனோன்மணியம் சுந்தரனார் பல்கலைக்கழகத்தின் 29வது பட்டமளிப்பு விழா பல்கலைக்கழக வளாகத்தில் உள்ள வஉசி அரங்கில் நடைபெற்றது. இதில் தமிழ்நாடு ஆளுநர் ஆர்.என்.ரவி கலந்து கொண்டு மாணவ மாணவிகளுக்கு பட்டங்களை வழங்கி பாராட்டினார். இந்த பட்டமளிப்பு விழாவில் 2021- 22ஆம் ஆண்டில் படித்து முடித்த 43 ஆயிரத்து 861 பேர் பட்டம் பெற்றனர். 984 ஆய்வு மாணவர்கள் மற்றும் பதக்கம் பெற்ற 105 மாணவர்களும் நேரடியாக ஆளுநரிடம் பட்டங்களை பெற்றனர்.
முன்னதாக இந்த நிகழ்ச்சியில் பிரதமரின் பொருளாதார ஆலோசனை குழு தலைவர் பிபேக் தெப்ராய் கலந்துகொண்டு பட்டமளிப்பு விழா சிறப்புரை உரையாற்றினார். அப்போது அவர் பேசுகையில் ”இமயம் முதல் குமரி வரை பல்வேறு வளங்களை இந்திய நாடு பெற்றுள்ளது. மேலை நாடுகளில் பல்கலைக்கழகங்கள் உருவாவதற்கு முன்பே நாளந்தா,தட்சசீலம் போன்ற இடங்களில் பல்கலைகழகங்கள் இருந்தது. பாரம்பரியமிக்க நம் நாட்டில் மேலை நாடுகளில் பட்டமளிப்பு விழா நடத்துவதற்கு முன்பே பட்டங்கள் வழங்கப்பட்டுள்ளது.
கொல்கத்தா பல்கலைக்கழகத்தில் ஆங்கிலேய ஆதிக்க காலத்தில் இந்தியா இருந்த போது ஆசியாவிலேயே முதல் பெண் பட்டதாரியாக 1943இல் காதம்பரி என்பவர் பட்டம் பெற்றார். தற்போது அதிகளவில் பெண்கள் பட்டம் பெறுகின்றீர்கள். உலக சுற்றுலாத் தளத்தில் இந்திய சுற்றுலா துறையால் ’அதிதி தேவோ பவ’ என்ற வாசகம் முழக்கமாக பயன்படுத்தப்படுகிறது.
இந்த வாசகம் இந்திய கலாச்சாரத்தையும் இந்து மதத்தையும் பற்றி பேசுகிறது. தைத்ரிய உபநிஷத்தில் வரும் மாத்ரு தேவோ பவபிதிர் தேவோ பவ, ஆச்சார்ய தேவோ பவ என்ற முழக்கங்கள் நம் தாய், தந்தை, ஆசான், விருந்தினர்களை கடவுளாக கருத வேண்டும் என சொல்கிறது. மாணவர்கள் அந்த வாசகங்களை பின்பற்றி நடக்க வேண்டும்.