பயன்பாட்டிற்கு வந்தது நெல்லை புதிய பேருந்து நிலையம்!

திருநெல்வேலி புதிய பேருந்து நிலையம் மற்றும் பாளையங்கோட்டை பேருந்து நிலையம் உள்ளிட்ட 110 கோடி ரூபாய் மதிப்புள்ள 12 திட்டங்களை முதலமைச்சர் மு.க.ஸ்டாலின் சென்னையில் இருந்து காணொலிக் காட்சி மூலம் திறந்து வைத்தார்.

திருநெல்வேலி: மாநகரத்தில் ஸ்மார்ட் சிட்டி திட்டத்தின்கீழ், ஆயிரம் கோடி மதிப்பில் பல்வேறு திட்டப் பணிகள் நடந்து வருகின்றன. நெல்லை வேய்ந்தான் குளம் அருகே 4 நடைமேடைகள் உடன் அமைந்திருந்த புதிய பேருந்து நிலையம் விரிவாக்கம் செய்யப்பட்டு கூடுதலாக இரண்டு நடைமேடைகள் அமைக்கப்பட்டுள்ளன.

தரை தளம், முதல் தளம் என வணிக வளாகம் போன்று கடைகளும் கட்டப்பட்டுள்ளன. ஏற்கெனவே 131 கடைகள் இருந்த நிலையில் தற்போது கூடுதலாக 65 கடைகள் பெரியளவில் கட்டப்பட்டுள்ளன. மேலும் டிஜிட்டல் வடிவ பிரமாண்ட திரைகள், மாணவர்கள் அறிவியல் திறனை வளர்த்துக்கொள்ளும் வகையில் அறிவியல் பூங்கா என 50 கோடி ரூபாய் மதிப்பில் பேருந்து நிலையம் நவீனப்படுத்தப்பட்டுள்ளது.

பேருந்து நிலையம் திறப்பு

இதுபோன்று பாளையங்கோட்டை பேருந்து நிலைய பழைய கட்டடங்களை இடித்து அகற்றி விட்டு, அங்கு புதிதாக 13.08 கோடியில் மறுகட்டமைப்பு செய்யப்பட்டுள்ளது.

நெல்லைச் சந்திப்பு ரயில் நிலையம் அருகில் 6.75 கோடி மதிப்பில் 3 தளங்களுடன் கூடிய இருசக்கர வாகன நிறுத்தம் அமைக்கப்பட்டுள்ளது. இவை உள்பட 110.19 கோடி மதிப்பில் முடிவடைந்த 12 திட்டப்பணிகளை சென்னையில் இருந்து முதலமைச்சர் மு.க.ஸ்டாலின் காணொலிக் காட்சி வாயிலாகத் திறந்து வைத்தார்.

இனிப்பு வழங்கி கொண்டாட்டம்

இதனைத் தொடர்ந்து புதிய பேருந்து நிலையத்தில் நடந்த நிகழ்ச்சியில் மாவட்ட ஆட்சியர் விஷ்ணு, சட்டப்பேரவை உறுப்பினர் அப்துல்வகாப், முன்னாள் சட்டப்பேரவைத் தலைவர் ஆவுடையப்பன், மாநகராட்சி ஆணையர் விஷ்ணு சந்திரன் ஆகியோர் குத்துவிளக்கேற்றினர். தொடர்ந்து பேருந்து இயக்கம் தொடங்கப்பட்டு மக்களுக்கு இனிப்பு வழங்கப்பட்டது.

இதையும் படிங்க:ஆறு தான் எங்களுக்கு வழிப்பாதை: சேற்றில் சிக்கி பள்ளிக்குச் செல்லும் அவலம்