திருநெல்வேலி மாவட்டம் மேலப்பாளையம் ஹாமிம்புரம் பகுதியில் ஏரி போன்று அதிக கொள்ளளவில் கன்னிமார்குளம் என்ற குளம் உள்ளது. சமீப காலமாக அப்பகுதியில் இருந்து வெளியேறும் கழிவுநீர் கன்னிமார் குளத்தில் கலக்கிறது. இப்பகுதியில் பாதாள சாக்கடை இல்லாததால், கன்னிமார்குளத்தில் கழிவுநீர் கலந்து மாசு ஏற்படுத்தி வருகிறது. இதனால் அப்பகுதியில் துர்நாற்றம் வீசி நோய்பாதிப்பை ஏற்படுத்தி வருகிறது.
இது தொடர்பாக இப்பகுதி மக்கள் பல்வேறு போராட்டங்களை நடத்தியும், மனுக்கள் அளித்தும் பிரச்னைகள் தீர்ந்தபாடில்லை எனப் பொதுமக்கள் தெரிவிக்கின்றனர். இந்நிலையில், மேலப்பாளையம் ஹாமிம்புரம் 3ஆவது தெருவைச் சேர்ந்த ஷாபி ரதமத்துல்லாவின் மகள் ஆகிலா (10) என்ற ஐந்தாம் வகுப்பு மாணவி, கன்னிமார் குளத்தில் கழிவுகள் கலப்பதைத் தடுக்கக் கோரி முதலமைச்சர் மு.க. ஸ்டாலினுக்கு கடிதம் எழுதியுள்ளார்.