நெல்லை பணிப்பெண் குடும்பத்திற்கு திமுக நிதி உதவி

நெல்லை: முன்னாள் மேயர் உமா மகேஸ்வரியுடன் கொலை செய்யப்பட்ட பணிப்பெண் மாரியம்மாள் குடும்பத்திற்கு திமுக சார்பில் ஒரு லட்சம் ரூபாய் நிதியுதவி வழங்கியுள்ளது.

நெல்லையில் கடந்த இரண்டு தினங்களுக்கு முன் முன்னாள் மேயர் உமா மகேஸ்வரி , அவரது கணவர் முருகசங்கரன், அவர்கள் வீட்டு பணிப்பெண் மாரியம்மாள் ஆகியோர் அடையாளம் தெரியாத நபர்களால் கொலை செய்யப்பட்டனர்.

பணிப்பெண் மாரியம்மாளுக்கு வயது முதிர்ந்த தாய், மூன்று மகள்கள் உள்ளனர். மாரியம்மாள் இறந்ததால் அவரது குடும்பம் ஆதரவற்ற நிலையில் நிற்கிறது.

இதனையடுத்து, மாரியம்மாள் குடும்பத்திற்கு 1 லட்சம் ரூபாய் நிதியுதவி வழங்கப்படும் என திமுக தலைவர் மு.க.ஸ்டாலின் அறிவித்திருந்தார்.

அதன்படி, இன்று காலை அக்கட்சியின் பாளையங்கோட்டை சட்டப்பேரவை உறுப்பினர் மைதீன்கான் தலைமையில் திமுகவினர் மாரியம்மாள் வீட்டிற்கு சென்று அவரது மகள்களிடம் ஒரு லட்சம் ரூபாயை வழங்கி ஆறுதல் கூறினர்.