"மாவட்டத்தை மாத்தன எங்களுக்கு மேயரெல்லாம் ஒரு மேட்டரா?" - வைரலாகும் ஆடியோவும், கவுன்சிலரின் விளக்கமும்!

நெல்லையில் ஊழலில் முறையான பங்கு வேண்டும் எனக் கேட்டு மேயரை வாட்ஸ்ஆப் குரூப்பில் கவுன்சிலர் மிரட்டியதாக ஆடியோ ஒன்று வெளியான நிலையில், கவுன்சிலர் தன்னிலை விளக்கம் அளித்துள்ளார்.

திருநெல்வேலி:நெல்லை மாநகராட்சியில் மொத்தம் 55 வார்டுகள் உள்ளன. இதில் 49 இடங்களில் திமுகவைச் சேர்ந்த கவுன்சிலர்களும், ஒரு வார்டில் கம்யூனிஸ்ட் கட்சியைச் சேர்ந்த கவுன்சிலர், மூன்று வார்டில் அதிமுக கவுன்சிலர்கள் மற்றும் ஒரு வார்டில் சுயேட்சை கவுன்சிலரரும் உள்ளனர். இந்நிலையில் 16-வது வார்டில் போட்டியிட்டு வெற்றி பெற்ற சரவணன் மேயராக உள்ளார்.

அதேபோல் 1-வது வார்டில் போட்டிட்டு வெற்றி பெற்ற கவுன்சிலர் ராஜு துணை மேயராக உள்ளார். இந்த நிலையில் நெல்லை மாநகராட்சியில் கவுன்சிலர்கள் பொறுப்பேற்று 1 ஆண்டுகளுக்கு மேலாகியும், தற்போது வரை அடிப்படை வசதிகள் செய்து கொடுக்கப்படவில்லை என பல்வேறு பகுதிகளிலிருந்து பொதுமக்கள் குற்றம் சாட்டி வருகின்றனர்.

குறிப்பாக கழிவுநீர் கால்வாய் குடிநீர் பிரச்னை உட்பட மக்களின் அன்றாட தேவைகளுக்கு மாநகராட்சி செவி கொடுக்காமல் இருப்பதாக மன்ற கூட்டங்களில் ஆளுங்கட்சி கவுன்சிலர்களே குறை கூறி வருகின்றனர். மேலும் மாநகராட்சி சார்பில் மேற்கொள்ளப்படும் திட்டப் பணிகளில் முறைகேடு நடைபெறுவதாகவும் புகார் உள்ளது.

நெல்லை மாநகராட்சி நிர்வாகத்தின் இந்த குழப்பத்திற்கு திமுகவின் உட்கட்சி பூசலே முக்கிய காரணம். அதாவது மாநகராட்சியின் 49 திமுக கவுன்சிலர்களும், முன்னாள் மாவட்ட செயலாளர் அப்துல் மூலம் அந்த பதவிக்கு வந்தார்கள். குறிப்பாகக் கட்சியில் சாதாரண பொறுப்பிலிருந்த சரவணன் அப்துல் வகாப் மூலம் கவுன்சிலராகி பின்னர் மேயராக தேர்வு செய்யப்பட்டார்.

அதேசமயம் வழக்கம்போல் மாநகராட்சி மூலம் செயல்படுத்தப்படும் திட்டங்களில் ஒப்பந்ததாரர்களிடம் சதவீத அடிப்படையில் மாவட்டச் செயலாளர் மேயர் கவுன்சிலர்கள் மற்றும் சிலர் கமிஷன் பெறுவதாகப் புகார் எழுந்தது. மேலும் திடீரென முன்னாள் மாவட்ட செயலாளர் அப்துல் வகாப் மேயர் சரவணன் இடையே மோதல் போக்கு ஏற்பட்டது. கமிஷன் கொடுக்கும் விவகாரத்தில் ஏற்பட்ட பிரச்னை தான் இந்த மோதலுக்குக் காரணம் எனவும் பலரால் கூறப்பட்டது.

அதேசமயம் கவுன்சிலர்கள் பெரும்பாலானோர் அப்துல் வகாப்புக்கு விசுவாசமாக இருந்தனர். எனவே அப்துல் வகாப் தனது ஆதரவு கவுன்சிலர்கள் மூலம் தொடர்ச்சியாக மாநகராட்சி மன்ற கூட்டங்களில் மேயருக்கு எதிராக குரல் எழுப்ப வந்தார். குறிப்பாக மேயர் சரவணன் தனது அறையில் வைத்து, ஒப்பந்ததாரரிடம் கமிஷன் கேட்பதாக ஆளுங்கட்சி கவுன்சிலர்களே வெளிப்படையாக குற்றம் சாட்டினர்.

மேலும் மேயரை கண்டித்து ஆளுங்கட்சி கவுன்சிலர்கள் மன்ற கூட்டத்தில் தர்ணா போராட்டத்தில் ஈடுபட்டு தகராறு செய்தனர். மாவட்டச் செயலாளர் மேயர் இடையிலான இந்த மோதல் போக்கு காரணமாக நெல்லை மாநகராட்சியில் பல்வேறு பணிகள் பதிக்கப்பட்டது. எனவே இது போன்ற சூழ்நிலையில் உள்கட்சி பூசல் அதிகமானதால் அப்துல் வகாப் மாவட்ட செயலாளர் பொறுப்பிலிருந்து அதிரடியாக நீக்கப்பட்டார்.

இதனால் மேயர் சரவணனுக்கு இருந்த பெரும் தலைவலி நீங்கியது என்றே கூறப்பட்டது. எனவே கவுன்சிலர்கள் அனைவரையும் தனது பக்கம் இழுக்கும் முயற்சியில் மேயர் ஈடுபட்டார். மேலும் அப்துல் வகாப் மாவட்ட செயலாளர் பொறுப்பில் இருந்து நீக்கப்பட்ட பிறகு முதல் முறையாக சமீபத்தில் நடைபெற்ற நெல்லை மாநகராட்சி மன்ற கூட்டத்தில் கவுன்சிலர்கள் யாரும் பிரச்னை எழுப்பவில்லை.

இந்த நிலையில், மேயர் சரவணன் கமிஷன் தொகையை சரிவர பிரித்து வழங்காமல் பாரபட்சம் காட்டுவதாக ஆறாவது வார்டு கவுன்சிலர் பவுல்ராஜ் குற்றச்சாட்டை முன்வைக்கும் பரபரப்பு வீடியோ ஆடியோ ஒன்று தற்போது வெளியாகியுள்ளது. அதாவது மேயர் சரவணனை அட்மின் ஆக வைத்து வாட்ஸ்அப் குழு ஒன்று வைத்துள்ளனர். அதில் திமுக கவுன்சிலர்கள் அனைவரும் உறுப்பினராக உள்ளனர். அந்த குழுவில் தான் கவுன்சிலர் பவுல்ராஜ் ஆடியோ வெளியிட்டுள்ளார்.

அந்த ஆடியோவில் பேசும் பவுல்ராஜ், "அண்ணே எல்லோரும் பேசி ஒரு முடிவு எடுத்து ஆக வேண்டும். இதற்கு மேலும் நீங்கள் தன்னிச்சையாக செயல்பட வேண்டும் என்று நினைத்தால் நல்லா இருக்காது. உங்க கூட இருந்த காரணத்துக்காக நாங்களும் கெட்ட பெயர் எடுக்கனும். லாபத்தை எல்லோருக்கும் பகிர்ந்து அளிக்க வேண்டும் என்ற எண்ணத்தை கொண்டு வாருங்கள்.

காண்ட்ரக்ட்காரர்களை கட்டாயப்படுத்தி அவர்களிடம் அதிக சதவீதம் (கமிஷன்) வேண்டும் என்று சொல்லி, கணக்கில் 15 கொடு எனக்கு தனியாக 3 கொடு என்று சொல்வதையெல்லாம் விட்டுவிடுங்கள். மேலும் இப்படிதான் செய்வேன் என்றால் வகாப்பை (முன்னாள் மாவட்ட செயலாளர்) எதிர்க்கத் தெரிந்த எங்களுக்கு மேயரை எதிர்க்க முடியாது என்று இல்லை மேயரை மாற்ற மாட்டார்கள் என்று அபரீத நம்பிக்கையில் இருந்து விடாதீர்கள். வகாப்பை மாற்ற வேண்டும் என்று முடிவெடுத்த எங்களுக்கு மேயரையும் மாற்ற முடியும். எனவே பார்த்து கவனமாக இருந்து கொள்ளுங்கள். அவ்வளவுதான் சொல்வேன். உங்களை நீங்களே அசிங்கப்படுத்தி விடாதீர்கள்" என்று கூறியுள்ளார்.

இந்நிலையில், பொதுமக்களின் பிரச்னை குறித்து ஆலோசனை செய்வதற்காக மேயர் தலைமையில் ஆரம்பிக்கப்பட்ட வாட்ஸ்அப் குழுவில் கவுன்சிலர்கள் இதுபோன்று கமிஷன் விகாரத்தை வெளிப்படையாக பேசி ஆடியோ வெளியிட்ட சம்பவம் சமூக ஆர்வலர்களிலேயே கடும் அதிர்ச்சி ஏற்படுத்தி உள்ளது.

ஏற்கனவே அப்துல் வகாப் பொறுப்பில் இருந்து நீக்கப்பட்டதற்கு, உட்கட்சி பூசல் தான் முக்கிய காரணம் என்று கூறப்பட்டது. அதை உறுதி செய்யும் வகையில் நாங்கள் தான் வகாப்பை மாற்றினோம் என்று ஆளுங்கட்சி கவுன்சிலர் பவுல்ராஜ் வெளிப்படையாக பேசியுள்ளார். மேலும் மாவட்ட செயலாளரை மாற்ற தெரிந்த எங்களுக்கு மேயரையும் மாற்ற முடியும் என்று பகிரங்கமாக மேயர் சரவணனுக்கு அவர் மிரட்டல் விடுத்திருப்பது இந்த ஆடியோ மூலம் உறுதியாகியுள்ளது.

அதேபோல் ஆடியோவில் பேச ஆரம்பிக்கும் போது எங்களுக்கு கெட்ட பெயர் ஏற்படுத்திக் கொடுத்து விடாதீர்கள் என்று நல்லவர் போல் பேசிவிட்டு, கடைசியில் எல்லோருக்கும் பகிர்ந்து அளிக்க வேண்டும் என்று பேசி இருப்பது கமிஷன் தனக்கு சரிவர வரவில்லை என்ற ஆதங்கத்தை வெளிப்படுத்தி இருப்பது போன்று தெரிகிறது.

கமிஷன் தொடர்பாக நெல்லையில் திமுகவினர் பேசும் ஆடியோ இது புதிது அல்ல. ஏற்கனவே நெல்லை மாநகர திமுக செயலாளராக இருக்கும் சுப்பிரமணியன் ஒப்பந்ததாரர் ஒருவரிடம் நேரடியாக தனக்கும், அமைச்சருக்கும் தனித்தனியாக கமிஷன் வேண்டும் என்று பேசிய ஆடியோ ஒன்று வெளியானது. அதேபோல் மேலப்பாளையம் மண்டல சேர்மன் அதிக கமிஷன் கேட்பதாக திமுக பிரமுகர் பேசிய ஆடியோ ஒன்றும் வெளியானது.

இது போன்ற சூழ்நிலையில் மாநகராட்சி திட்டப் பணியில் தனக்கு கமிஷன் சரிவர வரவில்லை என்ற ஆதங்கத்தில் மேயர் சரவணனை மிரட்டும் வகையில் ஆளுங்கட்சி கவுன்சில் பவுல்ராஜ் வெளியிட்ட இந்த ஆடியோ அரசியல் வட்டாரத்தில் பெரும் பரபரப்பு ஏற்படுத்தி உள்ளது.

இதற்கிடையில் அந்த ஆடியோவில் பேசியது நான் இல்லை என்றும் தன்னை தவறாக சித்தரித்து ஆடியோ வெளியிட்டு இருப்பதாகவும், தேவைப்பட்டால் காவல்துறையில் புகார் அளிக்க இருப்பதாகவும் கவுன்சிலர் பவுல்ராஜ் பேசும் வீடியோ ஒன்றும் தற்போது வெளியாகி உள்ளது.