அமமுக கட்சியை பதிவு செய்யும் வேலை நடைபெற்று வருகிறது: டிடிவி தினகரன்!

நெல்லை: அமமுக கட்சியை பதிவு செய்யும் வேலை நடைபெற்று வருவதாகவும், நிலையான சின்னம் கிடைத்தால் நாங்குநேரி, விக்ரவாண்டி தொகுதிகளில் நடக்கவுள்ள இடைத்தேர்தலில் போட்டியிடுவோம் என டிடிவி தினகரன் தெரிவித்துள்ளார்.

சுதந்திர போராட்ட வீரர் ஒண்டிவீரனின் 248ஆவது நினைவு தினம் இன்று அனுசரிக்கப்பட்டு வருகிறது. பாளையங்கோட்டையில் உள்ள அவரது மணிமண்டபத்தில் அமமுக பொதுச்செயலாளர் டிடிவி தினகரன் மாலை அணிவித்து மரியாதை செய்தார். இதையடுத்து செய்தியாளர்களிடம் பேசிய அவர், மக்களை பாதிக்கும் பால் விலை உயர்வை அரசு திரும்பப் பெற வேண்டும். உள்ளாட்சி தேர்தல் அக்டோபர் மாதத்தில் நடத்துவார்களா என்பதை பொறுத்திருந்துதான் பார்க்க வேண்டும் என்றார்.

மேலும் அவர், ஒரு சிலர் கட்சியிலிருந்து பிரிந்து சென்றதால் கட்சிக்கு எவ்வித பாதிப்பும் ஏற்படவில்லை. அமமுக கட்சியை பதிவு செய்யும் வேலைகள் நடைபெற்றுவருகிறது. அதனையடுத்து நிலையான சின்னம் கிடைத்தால் நாங்குநேரி, விக்ரவாண்டி தொகுதிகளில் நடக்கவுள்ள இடைத்தேர்தலில் போட்டியிடுவோம் என தெரிவித்தார்.