திருநெல்வேலி: மத்தியில் ஆளும் பாஜக அரசு உள்ளூர் தயாரிப்புகளுக்கு அதிக முக்கியத்துவம் கொடுத்து வருகிறது. எனவே, பிரதமர் மோடி மேக் இன் இந்தியா திட்டத்தை (Make in India) தொடங்கி வைத்தார். இத்திட்டத்தின் கீழ் போர் விமானங்கள், ராணுவ உபகரணங்கள் நமது நாட்டிலையே உற்பத்தி செய்யப்படுகிறது. அந்தவகையில் உள்ளுர் பொருட்களுக்கு குரல் கொடுப்போம் என்ற நோக்கத்துடன் தெற்கு ரயில்வே சார்பில் 'ஒரு நிலையம் ஒரு தயாரிப்பு' என்ற திட்டம் கடந்தாண்டு மார்ச் மாதம் தொடங்கப்பட்டது.
இத்திட்டத்தின் கீழ் ரயில் நிலையங்களில் உள்ளூர் பொருட்களை விற்பனை செய்யவும் காட்சிப்படுத்தவும் முடிவு செய்யப்பட்டது. கடந்த 1ஆம் தேதி நிலவரப்படி, நாடு முழுவதும் 21 மாநிலங்கள் மற்றும் மூன்று யூனியன் பிரதேசங்களில் உள்ள 728 ரயில் நிலையங்களில் இத்திட்டம் செயல்படுத்தப்பட்டு வருகிறது. நாடு முழுவதும் 785 விற்பனை நிலையங்கள் உள்ளன. தமிழ்நாட்டில் தற்போது வரை சுமார் 100-க்கும் மேற்பட்ட ரயில் நிலையங்களில் இந்த திட்டம் செயல்படுத்தப்பட்டு வருகிறது.
கைவினைப் பொருட்கள், கலைப்பொருட்கள், ஜவுளி மற்றும் கைத்தறி, பாரம்பரிய ஆடைகள், விவசாயம் மூலம் விளைவிக்கப்பட்ட திணை வகைகள், பதப்படுத்தப்பட்ட மற்றும் அரை பதப்படுத்தப்பட்ட உணவுகள் இத்திட்டம் மூலம் சந்தைப்படுத்தப்படுகின்றன. அந்த வகையில், திருநெல்வேலி மாவட்டத்தில் திருநெல்வேலி சந்திப்பு ரயில் நிலையத்தில் கடந்தாண்டு இத்திட்டம் அறிமுகப்படுத்தப்பட்டது. இதைத்தொடர்ந்து அங்கு திருநெல்வேலி மாவட்டத்தில் உற்பத்தி செய்யப்படும் பத்தமடை பாய், பனை ஓலைப்பொருட்கள் போன்றவை விற்பனை செய்யப்பட்டு வருகின்றன. இந்த நிலையில், இரண்டாம் கட்டமாக திருநெல்வேலி மாவட்டம் அம்பாசமுத்திரம் ரயில் நிலையத்தில் ஒரு நிலையம் ஒரு தயாரிப்பு திட்டம் தற்போது தொடங்கப்பட்டுள்ளது.
அதில் அம்பையின் அடையாளமாக திகழக்கூடிய மரக்கடசல் (சொப்பு சாமான்கள்) பொருட்கள் இடம்பெற்றுள்ளன. இங்கு அம்பாசமுத்திரத்தை சேர்ந்த முருகேசன் என்பவர் இதற்கான டெபாசிட் தொகையை செலுத்தி அம்பாசமுத்திரம் ரயில் நிலையத்தில் மரத்திலான பொருட்களை விற்பனைக்காக வைத்துள்ளார். குறிப்பாக, குழந்தைகளுக்கு மரத்திலான பம்பரம், தள்ளுவண்டி, ஹெலிகாப்டர் கிலுக்கு உள்பட ஏராளமான மரப்பொருட்கள் வைக்கப்பட்டுள்ளன. எனவே, ரயில் நிலையம் வரும் பயணிகள் ஆர்வமுடன் இந்த மரக்கடசல் பொருட்களை வாங்கி செல்கின்றனர். குறிப்பாக, மண்மனம் வீசும் பனை ஓலை பெட்டிக்குள் வைத்து இந்த மரக்கடசல் பொருட்கள் வாடிக்கையாளர்களுக்கு வழங்கப்படுவது கூடுதல் சிறப்பாக உள்ளது.