சுருளி அருவி அருகே சந்தேகத்திற்கிடமான முறையில் மின்சாரம் தாக்கி சிறுவன் உயிரிழப்பு!

சுருளி அருவி அருகே சந்தேகத்திற்கிடமான முறையில் மின்சாரம் தாக்கி சிறுவன் உயிரிழந்த சம்பவம் தொடர்பாக காவல் துறையினர் விசாரணை நடத்திவருகின்றனர்.

தேனி: கூடலூர் அருகேயுள்ள கருநாக்கமுத்தன்பட்டி பகுதியைச் சேர்ந்த பரமன் மகன் தினேஷ் (16), பத்தாம் வகுப்பு முடித்துவிட்டு கால்நடை வளர்ப்பில் ஈடுபட்டுவருகிறார். நேற்றிரவு மாடுகளின் தீவனத்திற்காக புல் அறுத்துவருவதாக வீட்டில் கூறிவிட்டுச் சென்றுள்ளார்.

இரவு முழுவதும் வீடு திரும்பாத நிலையில், இன்று காலை சுருளி அருவி அருகேயுள்ள மலைப்பகுதியை ஒட்டியுள்ள தனியாருக்குச் சொந்தமான தென்னந்தோப்பில் தினேஷ் இறந்து கிடப்பதாகத் தகவல் கிடைத்துள்ளது.

அதனடிப்படையில், சம்பவ இடத்திற்குச் சென்று பெற்றோர், உறவினர்கள், காவல் துறையினர் பார்க்கையில், தினேஷ் உடலில் மின்சாரம் பாய்ந்து இறந்திருப்பது தெரியவந்தது. மேலும், அங்கு நான்கு நாய்களும் மின்சாரம் பாய்ந்து இறந்து கிடந்தன. சம்பவ இடத்தில் மின்வேலி ஏதும் இல்லாதது காவல் துறையினருக்குச் சந்தேகத்தை ஏற்படுத்தியுள்ளது.

இதைத்தொடர்ந்து, சம்பவ இடத்திற்கு வந்த உத்தமபாளையம் காவல் துணைக் கண்காணிப்பாளர் சின்னக்கண்ணு தலைமையிலான காவலர்கள் சம்பவ இடத்தை ஆய்வுசெய்தனர். இதன்பின்னர், தினேஷின் உடல் உடற்கூராய்விற்காக எடுத்துச் செல்லப்பட்டது.

இது தொடர்பாக வழக்குப்பதிவு செய்த ராயப்பன்பட்டி காவல் துறையினர், பல கோணங்களில் விசாரணை நடத்திவருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இதையும் படிங்க:சகோதரியின் மரணத்திற்கு பழி தீர்க்க மாமனாரை குத்திக் கொன்ற தம்பி