சொந்த ஊர்களில் வாக்குப்பதிவு செய்த தேனி வேட்பாளர்கள்...!

தேனி நாடாளுமன்றத் தொகுதி மற்றும் ஆண்டிப்பட்டி, பெரியகுளம் சட்டமன்றத் தொகுதி வேட்பாளர்கள் அவரவர் சொந்த ஊர்களில் உற்சாகமாக வாக்களித்தனர்.

தேனி நாடாளுமன்றத் தொகுதி அதிமுக வேட்பாளர் ரவீந்திரநாத்குமார் பெரியகுளம் தென்கரையில் உள்ள செவன்த்டே பள்ளி வாக்குச்சாவடி மையத்தில் தனது குடும்பத்துடன் சென்று வாக்களித்தார்.

அமமுக வேட்பாளர் தங்கதமிழ்செல்வன் தனது சொந்த ஊரான நாராயணத்தேவன்பட்டியில் உள்ள கள்ளர் அரசுப் பள்ளியில் வாக்களித்தார். இதேபோல் பெரியகுளம் சட்டமன்றத் தொகுதி திமுக வேட்பாளர் சரவணக்குமார் ஆனைமலையான்பட்டியிலும், ஆண்டிபட்டி திமுக வேட்பாளர் மகாராஜன் ஆண்டிபட்டி வைகை அணை சாலையில் உள்ள தனியார் பள்ளியிலும் வாக்களித்தனர்.

மேலும் பெரியகுளம் தொகுதி அதிமுக வேட்பாளர் மயில்வேல் அல்லிநகரத்திலும், ஆண்டிபட்டி அதிமுக வேட்பாளர் லோகிராஜன் முத்தனம்பட்டியிலும் வாக்களித்தனர். ஆண்டிப்பட்டி சட்டமன்ற தொகுதி அமமுக வேட்பாளர் ஜெயக்குமார் குன்னூர் அரசு மேல்நிலைப்பள்ளியிலும், பெரியகுளம் வேட்பாளர் கதிர்காமு தேனியில் உள்ள கான்வென்ட் பள்ளியிலும் தங்களது ஜனநாயகக் கடமையை ஆற்றினர்.