தேனி அருகே உள்ள ஆர்எம்டிசி காலணி எதிர்புறம் அதிமுக மாவட்டத் தலைமை அலுவலகம் கடந்த 2016ஆம் ஆண்டு காணொளி காட்சி வாயிலாக மறைந்த முன்னாள் முதல்வர் ஜெயலலிதாவால் திறந்து வைக்கப்பட்டது.
கொச்சின்-ராமேஸ்வரம் தேசிய நெடுஞ்சாலையில் அமைந்துள்ள இக்கட்டடம், ஜெயலலிதாவிடம் உறவினராக இருந்த பூங்குன்றன் என்பவரது பெயரில் உள்ளதாக கூறப்படுகிறது. இதனைத் தொடர்ந்து ஜெயலலிதாவின் மறைவிற்குப் பிறகு அதிமுகவில் ஏற்பட்ட பிளவு காரணமாக அதிமுக, அமமுகவினரிடையே இந்த கட்டடம் யாருக்குச் சொந்தம் என போட்டிகள் நிலவியது.
அதிமுக அலுவலகக் கட்டடம் யாருக்குச் சொந்தம்? இதனையடுத்து பூங்குன்றன் என்பவர் தினகரனின் ஆதரவாளர் என கூறப்பட்டதால், இந்த கட்டடத்தை அமமுகவினரே தொடர்ந்து பயன்படுத்தி வந்தனர். அதிமுக ஒருங்கிணைப்பாளராக தேர்வு செய்யப்பட்ட ஓ.பன்னீர்செல்வம் சென்னை ராயப்பேட்டையில் உள்ள தலைமைக்கழக அலுவலகத்தை கைப்பற்றினார். ஆனால் தனது சொந்த ஊரான தேனியில் உள்ள மாவட்ட கழக அலுவகத்திற்கு செல்ல முடியவில்லை. அமமுகவில் தங்க தமிழ்செல்வன் இருந்த வரையில் இந்த கட்டடத்தை கட்சி அலுவலக பணிகளுக்கு அவர் பயன்படுத்தி வந்தார். எனினும் எம்ஜிஆர், ஜெயலிலதா ஆகியோரின் பிறந்தநாள், நினைவுநாள் என முக்கிய நிகழ்வுகளில் இக்கட்டடம் களையிழந்தே காணப்பட்டது.
அதன் பின்னர், திமுகவில் தங்கதமிழ்செல்வன் ஐக்கியமான பிறகு, இந்த அலுவலகக் கட்டடம் முற்றிலும் களையிழக்க ஆரம்பித்தது. இதனைப் பயன்படுத்தி தற்போது அதிமுக இக்கட்டடத்தை கைப்பற்றிக்கொள்ள திட்டமிட்டுள்ளதாகக் கூறப்படுகிறது.
இந்நிலையில் சம்பந்தபட்ட கட்டடம் தங்களுக்குச் சொந்தமென பெரியகுளம் கோட்டாட்சியரிடம் அதிமுக, அமமுக நிர்வாகிகள் முறையிட்டுள்ளனர். அலுவக கட்டடம் தங்களுக்கு சொந்தம் என்பதற்கான ஆவணங்களை அமமுகவினர் சமர்ப்பித்துள்ளதாகக் கூறப்படுகிறது. அதிமுக சார்பில் கூடுதல் ஆவணங்கள் சமர்ப்பிக்க கால அவகாசம் கோரப்பட்டது. இரு தரப்பு வாதங்களையும் கேட்டறிந்த கோட்டாட்சியர் ஜெயப்பிரதா மீண்டும் விசாரணைக்கு தேதி குறிப்பிடாமல், விரைவில் தேதி அறிவிப்பதாகக் கூறி ஒத்தி வைத்தார்.
