நீட் தேர்வு ஆள்மாறாட்ட வழக்கு: வெங்கடேஷுக்கு நீதிமன்றக் காவல் நீட்டிப்பு!

தேனி: நீட் தேர்வு ஆள்மாறாட்ட வழக்கில் கைது செய்யப்பட்ட மாணவன் உதித்சூர்யாவின் தந்தை வெங்கடேஷுக்கு மேலும் 15 நாள்கள் நீதிமன்றக் காவல் நீட்டித்து நீதிபதி உத்தரவிட்டுள்ளார்.

நீட் தேர்வில் ஆள்மாறாட்டம் செய்ததாக தேனி அரசு மருத்துவக் கல்லூரியில் முதலாம் ஆண்டு படித்துவந்த மாணவன் உதித்சூர்யா மீது குற்றச்சாட்டு எழுந்தது. இது தொடர்பாக, கல்லூரி முதல்வர் ராஜேந்திரன் அமைத்த விசாரணைக் குழுவில் ஆள்மாறாட்டம் மோசடி உறுதியானதை அடுத்து மாணவர் உதித்சூர்யா குடும்பத்துடன் தலைமறைவானர்.

இந்த வழக்கை தனிப்படை காவல் துறையினர் விசாரணை செய்துவந்த நிலையில், பின்னர் சிபிசிஐடிக்கு மாற்றப்பட்டது. இதையடுத்து, கடந்த செப்டம்பர் 25ஆம் தேதி ஆந்திர மாநிலம் கீழ் திருப்பதியில் தலைமறைவாக இருந்த மாணவன் உதித்சூர்யா, அவரது தந்தை மருத்துவர் வெங்கடேஷ் கைது செய்யப்பட்டு தேனியில் உள்ள சிபிசிஐடி அலுவலகத்தில் விசாரணை நடைபெற்றது.

சிபிசிஐடி காவல் ஆணையர் விஜயகுமார் தலைமையில் நடைபெற்ற விசாரணையில் நீட் தேர்வில் ஆள்மாறாட்டம் செய்ததை ஒப்புக்கொண்டார். இதனைத் தொடர்ந்து, உதித்சூர்யா, அவரது தந்தை மருத்துவர் வெங்கடேஷ் ஆகியோரை சிபிசிஐடி காவல் துறையினர் கைது செய்து, கூட்டுச்சதி, ஆவணங்களைத் திருத்தி மோசடி செய்தல் உள்ளிட்ட மூன்று பிரிவுகளின் கீழ் வழக்குப்பதிவு செய்து நீதிமன்றத்தில் ஆஜர்படுத்தி மதுரை மத்திய சிறையில் அடைத்தனர்.

இதனிடையே, உதித்சூர்யாவிற்கு மட்டும் சென்னை உயர் நீதிமன்ற மதுரைக்கிளை பிணை அளித்தது. இந்நிலையில், வெங்கடேஷுக்கு நீதிமன்றக் காவல் முடிந்து இரண்டாவது முறையாக இன்று தேனி நீதித்துறை நடுவர் நீதிமன்றத்தில் ஆஜர்படுத்தப்பட்டார்.

இந்த வழக்கை விசாரித்த நீதிபதி பன்னீர்செல்வம், மேலும் 15 நாள் நீதிமன்றக் காவலை நீட்டித்து நவம்பர் 7ஆம் தேதி மீண்டும் நீதிமன்றத்தில் ஆஜர்படுத்த வேண்டும் என்று உத்தரவிட்டார். அதன்பின், மருத்துவர் வெங்கடேஷை மதுரை மத்திய சிறையில் அடைப்பதற்கு காவல் துறையினர் பாதுகாப்புடன் அழைத்துச் சென்றனர்.

இதையும் படிங்க:நீட் தேர்வு ஆள்மாறாட்ட வழக்கு: 8 பேரின் பிணை மனு தள்ளுபடி