மாடு மேய்த்துக் கொண்டிருந்த இளைஞரை தாக்கிய காட்டுப்பன்றி!

தேனி: பெரியகுளம் அருகே தோட்டத்தில் மாடு மேயத்துக் கொண்டிருந்த கல்லூரி மாணவரை காட்டுப்பன்றி தாக்கியதில் அவர் பலத்த காயமடைந்து சிகிச்சைக்காக மருத்துவமனையில் அனுமதிக்கப்பட்டுள்ளார்.

தேனி மாவட்டம் பெரியகுளம் அருகே மேற்குத் தொடர்ச்சி மலையை ஒட்டியுள்ளது ஈச்சமலை பகுதி. இங்கு ஜீவானந்தம் என்ற கல்லூரி மாணவர், அவருக்கு சொந்தமான மாந்தோப்பில் மாடுகளை மேய்த்துக் கொண்டிருந்தார். அப்போது மலைப்பகுதியில் இருந்து வந்த காட்டுப்பன்றி ஒன்று ஜீவானந்தத்தை விரட்டி விரட்டி தாக்கியுள்ளது.

இதில் கை, கால் என உடல் முழுவதும் பலத்த காயமடைந்தவரை அருகில் இருந்தவர்கள் மீட்டு பெரியகுளம் அரசு மாவட்ட தலைமை மருத்துவமனையில் சிகிச்சைக்காக அனுமதித்தனர்.அங்கு அவருக்கு தீவிர சிகிச்சை அளிக்கப்பட்டு வருகிறது.

மலைப்பகுதியை ஒட்டியுள்ள விளைநிலங்களுக்குள் வனவிலங்குகள் நுழையாதவாறு அகழி வெட்டுதல், வேலி அமைத்தல் உள்ளிட்ட நடவடிக்கைகளை வனத்துறையினர் மேற்கொள்ள வேண்டும் என அப்பகுதி விவசாயிகள் கோரிக்கை விடுத்துள்ளனர்.

இதையும் படிங்க:கதண்டு கடித்து லாரி ஓட்டுநர் உயிரிழப்பு