முல்லை பெரியாறு அணையின் பாதுகாப்பு பணி குறித்து துணை குழு ஆய்வு!

தேனி : முல்லை பெரியாறு அணையில் மேற்கொள்ள வேண்டிய பாதுகாப்பு பணிகள் குறித்து மத்திய நீர்வள ஆணைய துணை குழுவினர் ஆய்வு நடத்தி வருகின்றனர்.

கேரள மாநிலம் தேக்கடியில் அமைந்துள்ளது முல்லை பெரியாறு அணை. தமிழ்நாட்டின் தேனி, மதுரை, திண்டுக்கல், சிவகங்கை, ராமநாதபுரம் ஆகிய 5 மாவட்டங்களின் முக்கிய நீராதாரமாகத் திகழ்கிறது.

கடந்த 2014ஆம் ஆண்டு அணையின் நீர்மட்டத்தை 142 உயர்த்திக் கொள்ள உத்தரவிட்ட உச்சநீதிமன்றம், அணையை கண்காணித்து பராமரிக்க மூவர் குழுவை நியமித்தது. இந்த மூவர் குழுவிற்கு உதவியாக ஐந்து பேர் கொண்ட துணை கண்காணிப்புக் குழு அமைக்கப்பட்டது. இந்த துணை குழுவின் தலைவராக தற்போது மத்திய நீர்வள ஆணைய செயற்பொறியாளர் சரவணக்குமார் உள்ளார்.

அந்த குழுவில் தமிழ்நாட்டின் பிரதிநிதிகளாக பெரியாறு அணை சிறப்பு கோட்ட செயற்பொறியாளர் சாம் இர்வின், உதவி செயற்பொறியாளர் குமார், கேரள பிரதிநிதிகளாக கேரள நீர்ப்பாசனத் துறை செயற்பொறியாளர் பினுபேபி, உதவி பொறியாளர் பிரசீத் ஆகியோர் உள்ளனர். கடந்த ஜூன் 25ஆம் தேதி அணையின் நீர்மட்டம் 112.40 அடியாக இருந்த போது துணை குழுவினர் முல்லைப் பெரியாறு அணையில் ஆய்வு செய்தனர்.

இந்நிலையில், தென்மேற்குப் பருவமழை தற்போது கேரளாவில் தீவிரமடைந்து வருவதால் முல்லைப் பெரியாறு அணையின் நீர்மட்டம் வேகமாக உயர்ந்து வருகிறது. ஆகஸ்ட் 1ஆம் தேதி 115.25 அடியாக இருந்த நீர்மட்டம் தொடர்ந்து பெய்த கனமழையால் கிடுகிடுவென உயர்ந்து தற்போது 136.75 அடியை எட்டியுள்ளது.

கடந்த 10 நாள்களில் மட்டும் 21 அடிக்கும் மேல் நீர்மட்டம் உயர்ந்ததால், அணையில் மேற்கொள்ள வேண்டிய பாதுகாப்பு பணிகள் குறித்து துணை குழுவினர் இன்று (ஆகஸ்ட் 11) ஆய்வு நடத்தி வருகின்றனர். இந்த ஆய்வில் பெரியாறு பிரதான அணை, பேபி அணை, கேலரிப்பகுதி, மதகுப்பகுதி மற்றும் அணையின் நீர்வரத்து, சீப்பேஜ் வாட்டர் (கசிவுநீர்) வெளியேற்றம் குறித்து துணை குழுவினர் ஆய்வு செய்ய உள்ளனர்.

இதைத் தொடர்ந்து நடைபெறும் துணை குழுவின் ஆலோசனைக் கூட்டத்திற்கு பிறகு மேற்கொள்ளப்பட வேண்டிய பாதுகாப்புப் பணிகள் குறித்த ஆய்வறிக்கைகள் மூவர் குழுவிற்கு அனுப்பி வைக்கப்பட உள்ளதாக தகவல் வெளியாகியுள்ளது.