மூணாறு நிலச்சரிவு: மீட்கப்பட்ட சடலங்களின் எண்ணிக்கை 52ஆக அதிகரிப்பு

திருவனந்தபுரம்: மூணாறு ராஜமலை பெட்டிமுடி பகுதியில் ஏற்பட்ட நிலச்சரிவில் சிக்கி மீட்கப்பட்ட சடலங்களின் எண்ணிக்கை 52ஆக அதிகரிப்பு.

கேரள மாநிலம் மூணாறு அருகேயுள்ள பெட்டிமுடி எஸ்டெட் பகுதியில் கடந்த ஆகஸ்ட் 6ஆம் தேதி இரவு நிலச்சரிவு ஏற்பட்டது. கனமழையால் ஏற்பட்ட இந்த நிலச்சரிவில் எஸ்டேட்டில் பணிபுரியும் தேயிலைத் தோட்டத் தொழிலாளர்களின் 30 குடியிருப்புகள் சிக்கி மண்ணில் புதைந்தன.

இதில், 80 பேர் வரை காணமால் போனதாக தகவல்கள் வெளியாகின. இதைத் தொடர்ந்து தேசிய, மாநில பேரிடர் மேலாண்மைக் குழுவினர், வனத்துறையினர், காவல் துறையினர் உள்ளிட்ட 500க்கும் மேற்பட்டோர் சம்பவ இடத்திற்கு சென்று மீட்புப் பணியில் ஈடுபட்டனர். பெட்டிமுடி பகுதியில் நிலவுகின்ற மோசமான வானிலையால் மீட்புப் பணியில் தொய்வு ஏற்பட்டது.

முதற்கட்டமாக 12 பேர் பலத்தக் காயங்களுடன் மீட்கப்பட்டு மருத்துவமனையில் சிகிச்சைக்காக அனுமதிக்கப்பட்டனர். நேற்று (ஆக.11) பெட்டிமுடி பகுதியருகேயுள்ள ஆற்றுப்பகுதியிலிருந்து மூன்று பேரின் சடலங்கள் மீட்கப்பட்டுள்ளன. மீட்கப்பட்ட சடலங்கள் செல்லத்துரை (57), ரேகா (27), ராஜையா (55) ஆகியோரின் சடலங்கள் என அடையாளம் காணப்பட்டுள்ளன. தொடர்ந்து இன்றும் மீட்புப் பணிகள் தொடரும் என்று தெரிகிறது.

இதையும் படிங்க:'மூணாறு நிலச்சரிவு: கேரள அரசுடன் இணைந்து தமிழ்நாடு அரசு செயல்படவேண்டும்' - ஸ்டாலின்