டி.என்.டி ஒற்றைச் சான்றிதழ் கோரிக்கை - சவப்பெட்டியுடன் போராட்டத்தில் ஈடுபட்டவர்கள் கைது

தேனி: சவப்பெட்டியுடன் மாவட்ட ஆட்சியர் அலுவலகம் நோக்கி போராட்டத்தில் ஈடுபட்ட சீர்மரபினர்கள் கைது செய்யப்பட்டனர்.

தமிழ்நாட்டில் கள்ளர், மறவர் உள்ளிட்ட 68 உட்பிரிவுகளை உள்ளடக்கிய சீர்மரபினர் சமூக மக்கள் தங்களுக்கு வழங்கப்படும் டி.என்.டி / டி.என்.சி ஆகிய இரட்டைச் சான்றிதழ் முறையை ரத்து செய்து டி.என்.டி என்ற ஒற்றைச் சான்றிதழ் வழங்க வேண்டியும் டி.என்.டி மக்கள் தொகை கணக்கெடுப்பு நடத்தக்கோரியும் பல ஆண்டுகளாக போராடி வருகின்றனர்.

மதுரை மாவட்டம், கிண்ணிமங்கலத்தில் கடந்த ஜனவரி 1ஆம் தேதி முதல் சீர்மரபினர் சமூக மக்கள் காலவரையற்ற உண்ணாவிரதப் போராட்டத்தில் ஈடுபட்டுள்ளனர். இதனால் பலரது உடல்நிலை மோசமடைந்து வருவதாகவும் இதனை அரசுக்கு சுட்டிக்காட்டும் விதமாக தேனியில் உள்ள சீர்மரபினர் சமூக மக்கள் நேற்று (ஜன. 04) மாவட்ட ஆட்சியர் அலுவலகம் நோக்கி சவப்பெட்டியுடன் முற்றுகையிடும் போராட்டத்தில் ஈடுபட முயன்றனர்.

சவப்பெட்டியுடன் முற்றுகை

தேனி அரசினர் தொழிற்பயிற்சி நிலையத்தில் இருந்து ஊர்வலமாக புறப்பட்ட இவர்கள், சவப்பெட்டியுடன் தங்களது கோரிக்கைகளை வலியுறுத்தி அரசுக்கு எதிராக முழக்கங்களை எழுப்பினர்.

பின்னர் மாவட்ட காவல் கண்காணிப்பாளர் அலுவலகம் முன்பாக காவல் துறையினரால் தடுத்து நிறுத்தப்பட்டு போராட்டத்தில் ஈடுபட்ட சுமார் 20க்கும் மேற்பட்டோரை காவல் துறையினர் கைது செய்தனர்.

இதையும் படிங்க:நான்கு ஊராட்சியின் கீழ் ஒரு கிராமம்!