தேனி அருகே விபத்து! ஸ்டில்ஸ் சிவா மரணம்!

தேனி: உத்தமபாளையம் அருகே நடந்த சாலை விபத்தில் சூப்பர் குட் பிலிம்ஸ் ஆஸ்தான புகைப்பட கலைஞர் ஸ்டில்ஸ் சிவா உயிரிழந்தார்.

தேனி மாவட்டம் கோம்பை மேற்கு தொடர்ச்சி மலையடிவாரத்தில் உள்ள ரெங்கநாதர் கோவில் பகுதியில் கடந்த ஒரு வாரமாக சன்டிவியில் ஒளிபரப்பாகும் "ராசாத்தி" சின்னத்திரைத் தொடருக்கான படப்பிடிப்பு நடந்து வருகிறது. இதில் வருத்தப்படாத வாலிபர் சங்கம், கருப்பன் உள்ளிட்ட சுமார் 50க்கும் மேற்பட்ட படங்களில் குணச்சித்திர வேடங்களில் நடித்த தவசி என்பவரும் நடித்து வருகிறார்.

நேற்று மாலை படப்பிடிப்பை முடித்து விட்டு தவசியுடன் இத்தொடரில் புகைப்பட கலைஞராக பணியாற்றிய சூப்பர் குட் பிலிம்ஸ் ஆஸ்தான போட்டோகிராபர் ஸ்டில்ஸ் சிவாவும் ஒரே காரில் தனியார் விடுதிக்கு திரும்பிக் கொண்டிருந்தார். அப்போது, அவர்கள் பயணம் செய்த கார் கட்டுப்பாட்டை இழந்து பள்ளத்தில் கவிழ்ந்தது. இந்த விபத்தில் ஸ்டில்ஸ் சிவா சம்பவ இடத்திலேயே பரிதாபமாக பலியானார்.

தகவலறிந்து சம்பவ இடத்திற்கு வந்த கோம்பை காவல்துறையினர் விபத்தில் படுகாயமடைந்து உயிருக்கு ஆபத்தான நிலையில் இருந்த தவசியை மீட்டு உத்தமபாளையம் அரசு மருத்துவமனையில் அனுமதித்தனர். மேலும் விபத்தில் உயிரிழந்த ஸ்டில்ஸ் சிவாவின் உடலை கைப்பற்றி உடற்கூறு ஆய்விற்காக அரசு மருத்துவமனைக்கு அனுப்பி வைத்து வழக்குப் பதிவு செய்து விசாரித்து வருகின்றனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.