துணை முதலமைச்சரிடம் மனு அளித்த மலைவாழ் மக்கள்!

தேனி: பட்டா நிலங்களிலிருந்து காலி செய்யக் கோரும் வனத்துறை மீது நடவடிக்கை எடுக்கக்கோரி, அகமலை ஊராட்சி மலைவாழ் மக்கள் துணை முதலமைச்சர் ஓ.பன்னீர்செல்வத்திடம் நேரில் மனு அளித்தனர்.

தேனி மாவட்டம், பெரியகுளம் அருகே உள்ள சோத்துப்பாறை அணை, அகமலை ஊராட்சி ஆகியவை போடி சட்டப் பேரவைக்கு உட்பட்டதாகும். அதில் ஊத்துக்காடு, கரும்பாறை, பெரியமூங்கில், சின்னமூங்கில், பேச்சியம்மன் சோலை உள்ளிட்ட மலைக் கிராமங்கள் உள்ளன.

அங்குள்ள மலைவாழ் மக்கள் மிளகு, காபி, ஏலக்காய், பலா, ஆரஞ்சு, எலுமிச்சை ஆகியவற்றை சொந்த பட்டா, அனுபவ பட்டா நிலங்களில் பயரிட்டு வருகின்றனர். இந்த நிலையில், அப்பகுதி மக்கள், தங்களது பட்டா நிலங்களில் விவசாயம் செய்ய விடாமல் தடுத்தும், மலைப்பகுதியை விட்டு வெளியேறுமாறும் வனத்துறையினர் நோட்டீஸ் வழங்கி வருவதாகத் தெரிவித்துவருகின்றனர்.

இந்த நிலையில், நேற்று (அக்.15) பெரியகுளம் கைலாசபட்டியில் உள்ள துணை முதலமைச்சர்ஓ. பன்னீர்செல்வத்தின் பண்ணை வீட்டில் அவரை நேரில் சந்தித்து, அப்பகுதி மக்கள் கோரிக்கை மனு ஒன்றை அளித்தனர்.

அம்மனுவில், "தலைமுறை தலைமுறையாக விவசாயத்தை மட்டுமே பிரதானத் தொழிலாக செய்து வரும் எங்களை நோட்டீஸ் வழங்கி, 15 நாள்களுக்குள் மலைப்பகுதியை விட்டு வெளியேற வேண்டும் என வனத்துறையினர் கட்டாயப்படுத்துகின்றனர்.

வனத்துறையின் செயலை தடுத்து நிறுத்தி, எங்களின் வாழ்வாதாரம் காக்க நடவடிக்கை எடுக்க வேண்டும்" என அதில் குறிப்பிட்டுள்ளனர்.

இதையும் படிங்க:ஓ.பன்னீர் செல்வத்தை சந்திக்க பெரியகுளம் பண்ணை வீட்டில் குவிந்த அதிமுக மாவட்ட நிர்வாகிகள்!