தொண்டர்களே கட்சியின் தலைமையை தேர்வு செய்ய வேண்டும் - எம்ஜிஆர் கையெழுத்துடன் போஸ்டரடித்த அதிமுகவினர்!

அதிமுக நிறுவனர் மறைந்த முன்னாள் முதலமைச்சர் எம்ஜிஆர் வகுத்த சட்ட விதிகளின்படி தொண்டர்களே கட்சியின் தலைமையை தேர்ந்தெடுக்கவேண்டும் என அறிவித்து நாளை மறுநாள் நடக்கும் அதிமுக பொதுக்குழு கூட்டத்திற்கு தொண்டர்களுக்கு அழைப்பு விடுத்து எம்ஜிஆர் கையெழுத்துடன் சுவரொட்டிகள் ஒட்டப்பட்டுள்ளன.

தேனி: அதிமுகவில் எடப்பாடி பழனிசாமி ஆதரவாளர்கள் ஒற்றைத் தலைமை கோரிக்கையும், ஓ. பன்னீர்செல்வத்தின் ஆதரவாளர்கள் ஓபிஎஸ் தான் மறைந்த முன்னாள் முதலமைச்சர் ஜெயலலிதாவின் வாரிசு; ஆகையால் ஓபிஎஸ் தான் ஒற்றைத் தலைமையினை வகிக்க வேண்டும் என அதிமுகவில் சர்ச்சைகள் வலுத்து வருகின்றன.

இந்நிலையில், அதிமுக ஒருங்கிணைப்பாளர் ஓ.பன்னீர் செல்வத்தின் சொந்த ஊரான பெரியகுளம் உள்ளிட்ட தேனி மாவட்டத்தின் அனைத்துப் பகுதிகளிலும் அதிமுகவை தோற்றுவித்த எம்ஜிஆரின் கையெழுத்துடன்கூடிய சுவரொட்டிகள் ஒட்டப்பட்டுள்ளன.

அந்த சுவரொட்டிகளில், 'அதிமுக நிறுவனர் எம்ஜிஆர் அவர்களின் கழக சட்ட விதிப்படி தொண்டர்களே கட்சியின் தலைமையை தேர்வு செய்ய வேண்டும் என்ற விதி முறைகளை தங்களது அதிகாரத்தைப் பயன்படுத்தி மாற்ற முயற்சிக்கும் தீய சக்திகளுக்கு எங்களது கடும் கண்டனத்தை தெரிவித்துக்கொள்கின்றோம்.

தொண்டர்களின் உரிமையைப் பறிக்கும் வகையில் 23ஆம் தேதி சென்னையில் நடக்கும் பொதுக்குழுவிற்கு தமிழ்நாடு முழுவதும் இருக்கும் லட்சக்கணக்கான அனைத்திந்திய அண்ணா திராவிட முன்னேற்றக் கழகத் தொண்டர்கள் படை எடுப்போம். தொண்டர்களே கட்சியின் பொதுச்செயலாளரை தேர்வு செய்வார்கள்’ எனும் வாசகங்கள் அடங்கிய சுவரொட்டிகள் ஒட்டப்பட்டுள்ளன.

இந்த சுவரொட்டிகளில் எந்த ஆதரவாளர்கள் ஒட்டினார்கள் என்பது தெரியாத வகையில் இவன் அனைத்திந்திய அண்ணா திராவிட முன்னேற்றக் கழக உண்மைத் தொண்டன், எனக் குறிப்பிடப்பட்டு சுவரொட்டிகள் ஒட்டப்பட்டுள்ளன. இது அதிமுக நிர்வாகிகள் இடையே சலசலப்பை ஏற்படுத்தியுள்ளது.

இதையும் படிங்க:அதிமுகவிற்கு ஒற்றைத் தலைமை தான் சரி - பாஜக எம்.எல்.ஏ நயினார் நாகேந்திரன்