தேனியில் 4 மருத்துவர்கள், 18 குழந்தைகள் உட்பட 165 பேருக்கு கரோனா

தேனி: மாவட்டத்தில் 4 மருத்துவர்கள், 18 குழந்தைகள் உள்பட ஒரே நாளில் 165 பேருக்கு கரோனா  தொற்று இருப்பது உறுதி செய்யப்பட்டுள்ள நிலையில் இருவர் உயிரிழந்துள்ளனர்.

தேனி மாவட்டத்தில் கரோனா வைரஸ் பெருந்தொற்றால் நாளுக்கு நாள் நூறுக்கும் அதிகமானோர் பாதிக்கப்பட்டு வருகின்றனர். இதனை கட்டுப்படுத்த மாவட்ட நிர்வாகம் பல்வேறு தடுப்பு நடவடிக்கைகளில் ஈடுபட்டு வந்தாலும் வைரஸ் பரவலைக் குறைக்க முடியவில்லை.

இந்நிலையில் தேனி அரசு மருத்துவக் கல்லூரி மருத்துவமனையில் பணிபுரியும் மூன்று மருத்துவர்கள், ஒரு பயிற்சி மருத்துவர் என நான்கு மருத்துவர்கள், ஓடைப்பட்டி காவல்நிலைய சார்பு ஆய்வாளர், மயிலாடும்பாறை ஊராட்சி மன்ற செயலர், வைகை அணை பொதுப்பணித்துறை குடியிருப்பு, பெரியகுளம், போடி உள்ளிட்ட பகுதிகளைச் சேர்ந்த 18 குழந்தைகள் என மொத்தம் 165 பேருக்கு நோய்த்தொற்று இருப்பது கண்டறியப்பட்டுள்ளது.

இவர்களில் பெரும்பாலோனோர் பெரியகுளம், தேனியைச் சேர்ந்தவர்கள் ஆவர். இதைத்தொடர்ந்து சின்னமனூரில் 21 பேருக்கும், ஆண்டிபட்டி, போடியில் தலா 19 பேருக்கும், கம்பத்தில் 10 பேருக்கும், உத்தமபாளையத்தில் 15 பேருக்கும் வைரஸ் இருப்பது தெரியவந்துள்ளது.

இதனால் மாவட்டத்தில் கரோனாவால் பாதிக்கப்பட்டவர்களின் எண்ணிக்கை 2899ஆக அதிகரித்துள்ளது. அவர்களில் 1,554பேர் குணமடைந்து வீடு திரும்பியுள்ள நிலையில், தற்போது 1,307 பேர் சிகிச்சை பெற்று வருகின்றனர்.