தடுப்பூசி போடவில்லை என்றால் கடும் நடவடிக்கை - மாவட்ட ஆட்சியர் எச்சரிக்கை

இடம் பெயர்ந்து வரும் தொழிலாளர்களுக்கு தடுப்பூசி போடாத தொழிற்சாலைகள் மீது கடும் நடவடிக்கை எடுக்கப்படும் என நீலகிரி மாவட்ட ஆட்சியர் இன்னசென்ட் திவ்யா தெரிவித்துள்ளார்.

நீலகிரி: குன்னூர் அரசு மருத்துவமனை மிகவும் பழமை வாய்ந்தது. இந்த மருத்துவமனையில் சமீபத்தில் அவசர சிகிச்சைப் பிரிவு தன்னார்வலர்கள் மூலம் நவீனமயமாக்கப்பட்டது.

ரூ.10 லட்சம் மதிப்பில் நவீனப்படுத்தப்பட்ட இந்தக் கட்டடத்தை மாவட்ட ஆட்சியர் இன்னசென்ட் திவ்யா தொடங்கிவைத்தார்.

பின்னர் செய்தியாளர்களிடம் பேசிய அவர், ''பழமையான இந்த மருத்துவனையை நவீனப்படுத்தியது மக்களுக்கு பயனுள்ளதாக இருக்கும். நீலகிரி மாவட்டத்தில் கரோனா கட்டுப்பாட்டில் உள்ளது. எனினும் எஸ்டேட் பகுதிகளில் தொற்று அதிகரித்து வருகிறது.

இடம்பெயர்ந்து வரும் தொழிலாளர்கள் கட்டாயம் பரிசோதனை செய்து தனிமைப்படுத்திக் கொள்ள வேண்டும் என உத்தரவிடப்பட்டுள்ளது. மேலும் தடுப்பூசி கட்டாயம் செலுத்தி இருக்க வேண்டும்.

எனினும் சில தொழிற்சாலைகள் இதனை பின்பற்றுவதில்லை. இதனை கண்காணிக்க சிறப்பு குழு அமைக்கப்பட்டுள்ளது. அவ்வாறு பின்பற்றாத தொழிற்சாலைகள் மீது கடும் நடவடிக்கை எடுக்கப்படும்" என்றார்.

இதையும் படிங்க:மக்களவையில் விவாதத்திற்கு மோடி தயங்குவது ஏன்?