தமிழ்நாட்டில் வாகன விபத்துகள் அதிகரித்துவரும் நிலையில் விபத்தால் ஏற்படும் உயிரிழப்பைத் தடுக்கும் நடவடிக்கையாக சென்னை உயர் நீதிமன்றம் இருசக்கர வாகனத்தில் செல்பவர்கள் கட்டாயமாக தலைக்கவசம் அணிய வேண்டும் என உத்தரவிட்டது.
இந்நிலையில் நீலகிரி மாவட்டத்தில் காவல் துறை சார்பில் சாலை பாதுகாப்பு குறித்த விழிப்புணர்வு நிகழ்ச்சிகள் நடத்தப்பட்டுவருகின்றன. இதில் கலந்துகொண்ட காவல் துறை கண்காணிப்பாளர் கலைச்செல்வன், 'இன்று நீலகிரி மாவட்டம் முழுவதும் விபத்தில்லா நாளாக கடைப்பிடிக்கபடுகிறது' என்று தெரிவித்தார்.
இன்று விபத்தில்லா நாள் என்பதால் உதகை நகரப் பகுதிகளில் காவல் துறையினர் உள்ளூர் வாகன ஓட்டிகள், சுற்றுலா வாகன ஓட்டிகள், பொதுமக்களுக்கு சாலை பாதுகாப்பு குறித்தும், வாகனம் ஓட்டும்போது செல்போன் பேசக் கூடாது, மது அருந்திவிட்டு வாகனத்தை இயக்கக் கூடாது உள்ளிட்ட வாசகங்கள் அடங்கிய பிரசுரங்கள் வழங்கினர்.
மேலும் இருசக்கர வாகனத்தில் தலைக்கவசம் அணியாமல் வரும் வாகன ஓட்டிகளுக்கு உயர் நீதிமன்ற உத்தரவின்படி 500 ரூபாய் அபராதமும், தலைக்கவசம் அணியாமல் வாகனத்தின் பின் அமர்ந்து பயணிப்பவருக்கு 100 ரூபாய் அபராதம் என மொத்தம் 600 ரூபாய் அபராதம் வசூலிக்கப்பட்டுவருவதாக காவல் துறையினர் தெரிவித்தனர்.
