மலைப்பாதையில் அனைத்து வாகனங்களுக்கும் அனுமதி - சசிமோகன்

உதகை: நீலகிரியில் உள்ள கல்லட்டி மலைப்பாதையில் அனைத்து வாகனங்களும் செல்ல விரைவில் அனுமதிக்கப்படும் என்று மாவட்ட காவல் கண்காணிப்பாளர் சசிமோகன் தெரிவித்துள்ளார்.

நீலகிரி மாவட்டத்தில் 283 பகுதிகளில் கட்டடம் கட்டவும், கல்லட்டி மலைப்பாதையில் வாகனங்கள் செல்லவும் மாவட்ட நிர்வாகம் தடைவிதித்துள்ளது. இதனால் பொதுமக்கள் கடுமையாக பாதிக்கப்பட்டு வருவதால், தடைகளை நீக்கக்கோரி திமுக கூட்டணி கட்சிகள் சார்பில் நாளை முழு கடை அடைப்பு போராட்டம், உண்ணாவிரதப் போராட்டங்கள் நடைபெற உள்ளன.

இந்த போராட்டங்களை கைவிடக் கோரி மாவட்ட ஆட்சியர் இன்னசன்ட் திவ்யா தலைமையில் திமுக கூட்டணி கட்சி நிர்வாகிகளுடன் ஆலோசனை கூட்டம் நடைபெற்றது. பின்னர் செய்தியாளர்களை மாவட்ட காவல் கண்காணிப்பாளர் சசிமோகன் சந்தித்தார். அப்போது, 'கல்லட்டி மலைபாதையில் 2018ஆம் ஆண்டு நடைபெற்ற விபத்து காரணமாக வாகனங்கள் செல்ல தடை விதிக்கப்பட்டது' என்றார்.

மேலும், 'வெளிமாநிலம், வெளிமாவட்டங்களில் இருந்து வரும் வாகனங்கள் மலைப்பாதையில் அனுமதிப்பது குறித்து ஆய்வு செய்யப்பட்டுள்ளது. இன்னும் ஒரு மாத காலத்திற்குள் கல்லட்டி மலைபாதையில் அனைத்து வாகனங்களும் செல்ல அனுமதிக்கப்படும்' என்றும் அவர் கூறினார்.

இதையும் படிங்க: நெல்லையில் காவல் துறை வாகனம் மோதி பெண் உயிரிழப்பு!