தொடர் மழையால் தீவு போல் மாறிய பழங்குடி மக்கள் கிராமம்.. தற்காலிக மூங்கில் பாலமைத்து மீட்ட வனத்துறையினர்!

நீலகிரி மாவட்ட பகுதியில் கொட்டித் தீர்த்த கனமழையால் சாலைகள் சேதமடைந்து பழங்குடியின மக்களின் செங்கல்கொம்பை கிராமம் தனித் தீவு போல் மாறியது. கிராமத்தில் சிக்கிக் கொண்ட மக்களை தற்காலிக மூங்கில் பாலம் அமைத்து வனத்துறையினர் உள்ளிட்டோர் பத்திரமாக மீட்டனர்.

நீலகிரி:வடகிழக்கு பருவமழையை முன்னிட்டு தமிழ்நாட்டில் பல்வேறு இடங்களில் தொடர்ந்து கனமழை பெய்து வருகிறது. இந்நிலையில், நீலகிரி மாவட்டத்தில் குன்னூர், கோத்தகிரி மற்றும் அதன் சுற்றுவட்டார பகுதிகளில் தொடர் கனமழை பெய்து வருகிறது. இதன் காரணமாக குன்னூர் - மேட்டுப்பாளையம் மற்றும் கோத்தகிரி - மேட்டுப்பாளையம் நெடுஞ்சாலையில் பல இடங்களில் மண்சரிவு மற்றும் மரங்கள் விழுந்து பாதிப்பு ஏற்பட்டது.

இந்த நிலையில் குன்னூர் வருவாய் கோட்டத்திற்கு உட்பட்ட குன்னூரில் இருந்து சுமார் 25 கிலோ மீட்டர் தொலைவில் அடர்ந்த வனப்பகுதியில் உள்ளது செங்கல்கொம்பை என்ற பழங்குடியின கிராமம். இந்த கிராமத்திற்குச் செல்லக்கூடிய சாலை இடி விழுந்ததால் தனித் தீவு போல் கிராமம் மாறியது.

இந்நிலையில், செங்கல்கொம்பை பகுதியில் வாழும் 14 குடும்பத்தினரை குன்னூர் வட்டாட்சியர் கனிசுந்தரம், வருவாய் துறையினர் மற்றும் குன்னூர் வனத்துறையினர், பேரிடர் மீட்பு குழுவினர் ஆகியோர் அப்பகுதிக்கு மீட்க சென்றனர். பழங்குடியினர்கள் அப்பகுதியை விட்டு வர மறுத்ததால் நீண்ட நேரம் பேச்சுவார்த்தைக்கு பிறகு முதற்கட்டமாக ஆறு நபர்களை மட்டும் மீட்டு உலிக்கல் செங்கல்புதூர் பகுதியில் உள்ள முகாமில் பாதுகாப்பாக தங்க வைத்தனர்.

தற்போது அவர்களுக்கு தேவையான அனைத்து வசதிகளையும் அதிகாரிகள் செய்துள்ளனர். அதைத்தொடர்ந்து தற்போது மேலும் அங்கு உள்ளவர்களை மீட்க சில சிறப்பு முன்னேற்பாடுகளை அதிகாரிகள் செய்து வருகின்றனர். இந்நிலையில், அப்பகுதியில் உள்ளவர்களை மீட்கும் வகையில் மூங்கில் மூலம் தற்காலிக பாலம் அமைக்கப்பட்டுள்ளது.

இந்தப் பாலத்தின் வழியாக அப்பகுதியில் எஞ்சியிருந்தவர்களையும் அதிகாரிகள் மீட்டனர். இதனையடுத்து மீட்கப்பட்டவர்களின் எண்ணிக்கை அதிகரித்துள்ளதாகவும் அதிகாரிகள் தகவல் தெரிவித்துள்ளனர். இரண்டாம் கட்டமாக மீட்கப்பட்ட 5 நபர்கள் இன்று (நவ.25) காலை முகாமிற்கு அழைத்து வரப்பட்டனர்.

முகாமில் தங்கவைக்கப்பட்டுள்ள அப்பழங்குடியின கிராம மக்களுக்கு தேவையான மருந்தகங்கள், உணவுகள் போன்ற அனைத்து வசதிகளையும் அதிகாரிகள் ஏற்பாடு செய்தனர். மேலும், அப்பகுதிகளில் சேதமடைந்த சாலைகளை சீரமைக்க குன்னூர் வட்டாட்சியர் மற்றும் வருவாய் துறையினர் துறை ரீதியாக நடவடிக்கைகளை மேற்கொண்டு வருகின்றனர்.

இதையும் படிங்க:திண்டுக்கல் தொழிலதிபர் ரத்தினம் வீட்டில் நடைபெற்ற அமலாக்கத்துறை சோதனை நிறைவு!