நீலகிரி:வால்பாறை சிற்குன்றா வனப்பகுதியிலுள்ள வனத்துறை எஸ்டேட் அரசு விருந்தினர் மாளிகையில் செப்.23ஆம் தேதியன்று இரவு உயர் நீதிமன்ற நீதிபதி டி.ராஜாவின் மகன் நாராயணன், அவரது நண்பர்கள் சிலர் தங்கியுள்ளனர். பின்னர், அவர்கள் அங்குள்ள வனப்பகுதிக்குள் சென்றதாக கூறப்படுகிறது.
அப்போது, அங்கிருந்த வனச்சரக அலுவலர் ஜெயச்சந்திரன், இளைஞர்கள் வனத்திற்குள் வந்ததை கண்டித்து, திரும்பி செல்லுமாறு கூறியுள்ளார். இதனால், இளைஞர்களுக்கும், ஜெயசந்திரனுக்கும் இடையே வாக்குவாதம் ஏற்பட்டது. இந்நிலையில், வனச்சரகர் ஜெயசந்திரன் மீது பொள்ளாச்சி நீதிமன்ற எழுத்தாளர் மனோகரன் காவல் நிலையத்தில் புகார் அளித்தார்.
புகாரின் பேரில் வனச்சரகர் ஜெயச்சந்திரன் மீது ஜாமினில் வெளி வர முடியாத மூன்று பிரிவுகளில் வழக்குப்பதிவு செய்த காவல் துறையினர் அவரை கைது செய்து சிறையில் அடைத்தனர். இச்சம்பவத்திற்கு தமிழ்நாடு முழுவதுமுள்ள வனத்துறையினர் கண்டனம் தெரிவித்து வருகின்றனர்.