லாரி - இருசக்கர வாகனம் நேருக்கு நேர் மோதி விபத்து - ஒருவர் உயிரிழப்பு!

தஞ்சை: திருவையாறு அருகே லாரியும் இருசக்கர வாகனமும் நேருக்கு நேர் மோதிக்கொண்ட விபத்தில் இளைஞர் உயிரிழந்த சம்பவம் அப்பகுதியில் பேரும் சோகத்தை ஏற்படுத்தியுள்ளது.

தஞ்சை மாவட்டம் திருவையாறு அடுத்த கஸ்தூரிபாய் நகரை சேர்ந்த கூலித்தொழிலாளி சிவா(24). இவருக்கு ரம்யா என்ற மனைவியும், பர்வேஸ்ராம் என்ற ஒருவயது மகனும் உள்ளனர். இந்நிலையில் சிவா தனது சித்தப்பா மாகள் இளசியாவுடன் நேற்று (அக்.21) இருசக்கர வாகனத்தில் திருவையாறில் உள்ள நியாய விலைக்கடையில் மண்ணெண்ணை வாங்கிக்கொண்டு, வீட்டிற்கு திரும்பியுள்ளார்.

அப்போது கஸ்தூரிபாய் நகர் மெயின் ரோட்டில் வந்துக்கொண்டிருக்கும் போது எதிரே வந்த லாரியின் மீது நேருக்கு நேர் மோதியுள்ளார். இந்த விபத்தில் படுகாயமடைந்த சிவா சம்பவ இடத்திலேயே உயிரிழந்தார். மேலும் படுகாயமடைந்த இளசியா திருவையாறு அரசு மருத்துமனையில் அனுமதிக்கப்பட்டுள்ளார்.

தகவலறிந்து வந்த காவல்துறையினர் உயிரிழந்தவரின் உடலை மீட்டு, உடற்கூராய்வுக்காக தஞ்சாவூர் அரசு மருத்துவ கல்லூரி மருத்துவமனைக்கு அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர், விசாரணை நடத்தி வருகின்றனர்.

இதையும் படிங்க:ஜவுளிக் கடையில் துணிகள் திருடிய இரண்டு பெண்கள் கைது!