தியாகராஜ சுவாமிகளின் 175ஆவது ஆராதனை விழா: பஞ்ச ரத்ன கீர்த்தனைகள் பாடி இசையஞ்சலி

திருவையாற்றில் சங்கீத மும்மூர்த்திகளில் ஒருவரான தியாகராஜரின் 175ஆவது ஆராதனை விழா, இந்த ஆண்டு கரோனா பரவல் காரணமாக ஒரே ஒரு நாள் மட்டுமே நடைபெற்றது.

தஞ்சாவூர்மாவட்டம், திருவையாற்றில் ஆண்டுதோறும் தியாகராஜ சுவாமிகளின் ஆராதனை விழா நடைபெறுவது வழக்கம்.

அதன்படி, சங்கீத மும்மூர்த்திகளில் ஒருவரான தியாகராஜரின் 175ஆவது ஆராதனை விழா மங்கள இசையுடன் தொடங்கி நடைபெற்றது.

ஆண்டுதோறும் தியாகராஜர் ஆராதனை விழா 5 நாட்கள் நடைபெறுவது வழக்கம். இந்த ஆண்டு கரோனா பரவல் காரணமாக, இந்த விழா ஒரே ஒரு நாள் மட்டுமே நடைபெற்றது. இந்தவிழாவை தியாகப்பிரம்ம சபை தலைவர் ஜி.கே. வாசன் தொடங்கி வைத்தார்.

ஒரே நாளில் முடிந்த தியாகராஜர் ஆராதனை

ஸ்ரீ தியாகராஜ சுவாமிகள் சித்தியடைந்த பகுள பஞ்சமி நாளான நேற்று காலை 6.30 மணிக்கு உஞ்ச விருத்தி பஜனை தியாகராஜர் வாழ்ந்த இல்லமான திருவையாறு திருமஞ்சன வீதியிலிருந்து புறப்பட்டு, முக்கிய வீதிகள் வழியாக ஊர்வலமாகப் புறப்பட்டு, பஜனை பாடி அவரது சமாதிக்கு வந்தடைந்தனர்.

தியாகராஜ சுவாமி

இதனையடுத்து, 8.30 மணிக்கு நாதஸ்வர இசை, 9 மணி முதல் 10 மணி வரை பஞ்சரத்ன கீர்த்தனைகள் வைபவம் ஆகியவை நடைபெற்றன.

தமிழ்நாட்டின் அனைத்து மாவட்டங்களில் இருந்தும் வந்துள்ள ஆயிரக்கணக்கான இசைக் கலைஞர்கள், காவிரி ஆற்றின் படித்துறையில் கீர்த்தனைகளைப் பாடி தியாகராஜ சுவாமிக்கு இசையஞ்சலி செலுத்துவது வழக்கம்.

இந்த ஆண்டு கரோனா பரவல் காரணமாக குறைந்த அளவிலான இசைக் கலைஞர்களே தியாகராஜருக்கு இசை அஞ்சலி செலுத்தினர்.

மத்திய, மாநில அரசுகளின் வழிகாட்டுதலின்படி, இவ்விழா சமூக இடைவெளியைக் கடைப்பிடித்து நடைபெற்றது.