குடிபோதையில் தகராறு: ரவுடி வெட்டிக்கொலை

தஞ்சை: நேற்று நள்ளிரவில் குடிபோதையில் ஏற்பட்ட தகராறில், நண்பர்கள் மூவரால் ரவுடி அருண்குமார் என்பவர் படுகொலை செய்யப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.

தஞ்சாவூர் கீழவாசல் பகுதியைச் சேர்ந்த ரவுடி அருண்குமார்(37) என்பவர் மீது பல குற்ற வழக்குகள் உள்ளன. இந்நிலையில், நேற்று மதுபானக் கடைகள் திறந்ததால் அவர், தனது நண்பர்களான கட்டையன் (எ) கதிர்வேல், முத்து, பிச்சாண்டி ஆகியோருடன் அதே பகுதியில் பூமால்ராவுத்தன் கோயில் தெருவில் உள்ள கட்டையன் வீட்டில் மது அருந்தியுள்ளனர்.

நள்ளிரவில், போதையில் ஏற்பட்ட தகராறில் அருண்குமார் கொடூரமாக வெட்டி கொலை செய்யப்பட்டார். அதன்பின்னர், அவரது நண்பர்கள் மூவரும் அங்கிருந்து தப்பியோடிவிட்டனர்.

இதுகுறித்து தகவலறிந்து வந்த கிழக்கு காவல் நிலைய காவலர்கள், அருண்குமாரின் உடலைக் கைப்பற்றி உடற்கூறாய்விற்காக அரசு மருத்துவக் கல்லூரி மருத்துவமனைக்கு அனுப்பி வைத்தனர். இச்சம்பவம் தொடர்பாக காவலர்கள் வழக்குப்பதிவு செய்து தலைமறைவாக உள்ள கட்டையன், முத்து, பிச்சாண்டி ஆகிய மூவரையும் தேடிவருகின்றனர்.

இதையும் படிங்க:ஒரே நாளில் டாஸ்மாக் கடைகளில் 170 கோடி வசூல்