'திமுக - மநீம கூட்டணி காலம்தான் பதில் சொல்லும்' - சினேகன்

தஞ்சாவூர்: "உள்ளாட்சித் தோ்தலில் திமுகவுடன் கூட்டணி சேருவது குறித்து காலம்தான் தீர்மானிக்கும்" என்று, மக்கள் நீதி மய்யம் கட்சியின் மாநில செயற்குழு உறுப்பினர் சினேகன் தெரிவித்தார்.

கும்பகோணம் அருகே உள்ள திருபுவனத்தில் நேற்றிரவு மக்கள் நீதி மய்யம் கட்சி சார்பில் நன்றி அறிவிப்பும், நலத்திட்ட உதவிகள் வழங்கும் நிகழ்ச்சி நடந்தது. இதில் கலந்துக் கொண்ட மக்கள் நீதி மய்யம் கட்சியின் மாநில செயற்குழு உறுப்பினர் கவிஞர் சினேகன் செய்தியாளர்களை சந்தித்தார்.

அப்போது அவர் பேசுகையில், "கட்சி தொடங்கிய 14 மாதங்களில் 16 லட்சம் வாக்குகள் பெற்றுள்ளோம். தற்போது கட்சியில் உள்கட்டமைப்புகளில் மாற்றம் செய்ய வேண்டியுள்ளது. பிறகு உள்ளாட்சித் தேர்தலில் போட்டியிடுவது குறித்து முடிவெடுப்போம். விவசாயத்தை அழிக்கும் மீத்தேன், ஹைட்ரோகார்பன் போன்ற திட்டங்கள் குறித்து கட்சியின் தலைவர் கமலஹாசன், அறிக்கையாகவும், கோரிக்கையாகவும் மத்திய மாநில அரசுகளிடம் வழங்கி வருகிறார்.

உண்ணாவிரதம், போராட்டம், பஸ் மறியல் போன்ற செயல்களால் பொதுமக்கள்தான் அதிகமாக பாதிக்கப்படுகிறார்கள். தமிழ்நாட்டில் ஜல்லிகட்டு போராட்டத்தை தவிர மற்ற எந்த போராட்டத்திற்கும் நீதி கிடைக்கவில்லை. போராட்டம் செய்வதால் அதில் வெற்றி பெறுவோம் என்ற நம்பிக்கை இல்லை.

எங்களுக்கு பிரதமர் மோடியோ, முதலமைச்சர் ஈபிஎஸ் எதிரி இல்லை. மத்திய மாநில அரசுகள்தான் எதிரி. மக்களை எதிர்க்கும் எந்த அரசும் எங்களுக்கு எதிரிதான். வருகின்ற உள்ளாட்சி தேர்தலில் திமுகவுடன் கூட்டணி சேர்வது குறித்து காலம்தான் தீர்மானிக்கும். தமிழ்நாட்டில் கைது செய்ய வேண்டியவர்கள் நிறைய பேர் உள்ளனர். முதலில் லஞ்சம் வாங்கிய அரசியல்வாதிகளைத் தான் காவல்துறை கைது செய்யவேண்டும்" என்றார்.