கீழடி அகழாய்வு கண்காட்சியை வரவேற்றுள்ள சீமான்!

தஞ்சை: கீழடியில் கண்டெடுக்கப்பட்ட பொருட்களை தமிழ்நாட்டிலேயே காட்சிப்படுத்துவது என்பது வரவேற்கத்தக்கது என்று நாம் தமிழர் கட்சி தலைமை ஒருங்கிணைப்பாளர் சீமான் தெரிவித்துள்ளார்.

தஞ்சையில் நாம் தமிழர் கட்சி தலைமை ஒருங்கிணைப்பாளர் சீமான் செய்தியாளர்களைச் சந்தித்தார். அப்போது அவர், "கீழடி அகழாய்வு ஆராய்ச்சியில் கண்டெடுக்கப்பட்ட பொருட்களை முன்பு எல்லாம் பெங்களூருவில் காட்சிப்படுத்தப்பட்டு வந்தது. தற்போது அவற்றை இங்கேயே காட்சிப்படுத்தியிருப்பது வரவேற்கத்தக்கது .

பிற மாநிலங்களில் கீழடி பொருட்களை கண்காட்சிக்கு வைக்கும்போது அதனுடைய பாதுகாப்பு தன்மையின் நேர்மை கேள்விக்குறியாக உள்ளது. ஆனால் தற்போது இங்கேயே காட்சிப்படுத்துவது பாதுகாப்பாகவும் வருங்கால சந்ததியினருக்கு விழிப்புணர்வு ஏற்படுத்தும் விதமாகவும் இருக்கும்.

உணவு, உடை, உறைவிடம் ஆகியவை மனிதனுக்கு இன்றியமையாதது என குன்றக்குடி அடிகளார் கூறியிருக்கிறார், இதைவிடுத்து கொள்ளைச் சம்பவங்களை எல்லா இடங்களிலும் சிசிடிவி கேமராவை வைத்து நாடு முழுவதும் கண்காணிப்பின் மூலம் கட்டுப்படுத்த முடியாது. இதை அரசு புரிந்து கொள்ள வேண்டும்.

தமிழ்நாடு நாள் கொண்டாடப்படுவது வரவேற்கிறோம். ஆனால் உண்மையாகவே தமிழ்நாடாகவும் தமிழர் நாடாகவும் செயல்படுத்த வேண்டும். குறிப்பாக பேருந்துகளில் பெயர் பலகையில் தமிழில் முதலில் எழுத வேண்டும். அடுத்தப்படியாக தான் ஆங்கிலத்தை பயன்படுத்த வேண்டும்.

மாமன்னர் ராஜராஜசோழன் தங்கள் ஜாதியை சேர்ந்தவர் என பெருமை கொண்டு கொள்வதைவிட தமிழினத்தின் பேரரசன் என பெருமைப்படும்போதுதான் இன ஒற்றுமை ஏற்படும்" என்றார்.

மேலும் படிக்க:#Exclusive: 'மத்திய அரசு அனுமதித்தால் கீழடி அகழாய்வில் ஈடுபடத் தயார்' - மனம் திறந்த அமர்நாத் ராமகிருஷ்ணா!