தஞ்சாவூர்:'குறள்நெறி செல்வர்' என அன்புடன் அழைக்கப்படும் திமுக முன்னாள் அமைச்சர் உபயதுல்லா கடந்த 19ம் தேதி உடல்நலக்குறைவால் காலமானார். தஞ்சாவூரில் 4 முறை சட்டமன்ற உறுப்பினராக இருந்த உபயதுல்லா, கடந்த 2006ம் ஆண்டு முதல் 2011ம் ஆண்டு வரை, திமுக அமைச்சரவையில் வணிகவரித்துறை அமைச்சராக பதவி வகித்தார்.
திமுகவில் தஞ்சாவூர் நகரச்செயலாளராக 27 ஆண்டுகள் பணியாற்றியதுடன், மாநில வர்த்தக அணித் தலைவராகவும், தலைமைச் செயற்குழு உறுப்பினராகவும் இருந்தார்.கடந்த 2020ம் ஆண்டு திமுக முப்பெரும் விழாவில் கலைஞர் விருதும், கடந்த ஜனவரி மாதம் நடைபெற்ற அரசு விழாவில் தமிழ்நாடு அரசின் பேரறிஞர் அண்ணா விருதும் வழங்கி, உபயதுல்லா கவுரவிக்கப்பட்டார். 30 ஆண்டுகளுக்கும் மேலாக தஞ்சை முத்தமிழ் மன்றம் என்ற அமைப்பை நடத்தி வந்தார்.