தேனி: போடி ஒன்றியத்திற்குட்பட்ட டாப் ஸ்டேசன், சென்ட்ரல் ஸ்டேசன், மாங்காய்பள்ளம், புல்லனூர், மேல்முட்டம், கீழ்முட்டம், கேளையாட்டுப்பள்ளம், முதுவார்க்குடி, பச்சையாத்துக்கானல் உள்ளிட்ட மலைக்கிராமங்களுக்கு குரங்கணியில் இருந்து 12 கி.மீ. தூரம் குதிரைகள் மூலம் வாக்குப்பதிவு பெட்டிகள் எடுத்துச்செல்லப்பட்டன.
கோவை: சூலூர் ஒன்றிய ஊரக உள்ளாட்சிப் பகுதியிலுள்ள 143 வாக்குச்சாவடிகளுக்கும், சுல்தான்பேட்டை பகுதியிலுள்ள 120 வாக்குச்சாவடிகளுக்கும் சூலூர் ஊராட்சி ஒன்றிய அலுவலகத்திலிருந்து அந்தந்த வாக்குச் சாவடிகளுக்கு வாக்குப்பெட்டி, பூத் ஸ்லிப், வாக்குச்சீட்டு போன்ற பல்வேறு உபகரணங்கள் அனுப்பும் பணியை மாவட்ட ஆட்சியர் ராஜாமணி தொடங்கி வைத்து பார்வையிட்டார்.
வாக்குப்பதிவு பெட்டிகள் கொண்டு செல்லும் பணி தஞ்சாவூர்: பட்டுக்கோட்டை ஒன்றியத்திற்குட்பட்ட பகுதிகளுக்கு வாக்குப்பெட்டிகளை அனுப்பும் பணி தீவிரமாக நடைபெற்றுவருகிறது. இதையொட்டி பட்டுக்கோட்டை ஊராட்சி ஒன்றிய அலுவலகத்தில் சரியாக இரண்டு மணியளவில் 189 வாக்குச்சாவடிகளுக்கு 16 வேன்களில் வாக்குப்பெட்டிகள் அனுப்பி வைக்கப்பட்டன.
சேலம்: எட்டு ஊராட்சி ஒன்றியங்களுக்கு இரண்டாம் கட்ட தேர்தல் நடைபெறுவதையொட்டி வாக்குச்சாவடிகளில் பயன்படுத்தப்படவுள்ள வாக்குப்பெட்டிகள், மை பெட்டிகள், வாக்குச் சீட்டுகள் உள்ளிட்ட பொருள்கள் அந்தந்த வாக்குச் சாவடிகளுக்கு காவல்துறை பாதுகாப்போடு அனுப்பி வைக்கப்பட்டன.
வாக்குப்பதிவு பெட்டிகள் கொண்டு செல்லும் பணி இரண்டாம் கட்டமாக நடைபெறும் இந்தத் தேர்தலில் 6 லட்சத்து 68 ஆயிரத்து 779 பேர் வாக்களிக்கவுள்ளனர். இதற்காக 1173 வாக்குச்சாவடிகள் அமைக்கப்பட்டுள்ளது. இந்தத் தேர்தல் பணிகளில் 9,500 பணியாளர்கள் ஈடுபடுத்தப்பட்டுள்ளனர. இந்தப் பணிகளை மாவட்ட ஆட்சியர் ராமன் பார்வையிட்டு ஆய்வு செய்தார்.
வாக்குப்பதிவு பெட்டிகள் கொண்டு செல்லும் பணி நாகப்பட்டினம்: மயிலாடுதுறை ஒன்றியம் 17 மண்டலங்களாகப் பிரிக்கப்பட்டு பொதுமக்கள் வாக்களிப்பதற்காக 246 வாக்குச்சாவடிகள் அமைக்கப்பட்டுள்ளன. அனைத்து வாக்குச்சாவடிகளுக்கும் ஓட்டுச்சீட்டுகள், மை பெட்டிகள் உள்ளிட்டவை அனுப்பி வைக்கும் பணி மயிலாடுதுறை ஊராட்சி ஒன்றிய அலுவலகத்தில் நடந்தது. நண்பகல் இரண்டு மணியளவில் தேர்தல் நடத்தும் அலுவலர் ஜோதி முன்னிலையில் ஓட்டுப் பெட்டிகள், ஓட்டுப் பெட்டிகள் ஏற்றப்பட்ட வாகனங்களுக்கு சிறப்புப் பூஜை செய்யப்பட்டது.
வாக்குப்பதிவு பெட்டிகள் கொண்டு செல்லும் பணி ராமநாதபுரம்: இரண்டாம்கட்ட வாக்குப்பதிவிற்குத் தேவையான வாக்காளர்கள் பட்டியல் வாக்குப்பெட்டி, வாக்குச்சீட்டுகள் முத்திரை, மை பெட்டிகள், தேர்தல் படிவங்கள் உள்ளிட்ட மொத்தம் 72 வகையான பொருள்களை அந்தந்த ஊராட்சி ஒன்றிய அலுவலகங்களில் இருந்து சம்பந்தப்பட்ட மண்டல அலுவலர் குழுக்கள் மூலமாக காவல் பாதுகாப்புடன் அந்தந்த வாக்குச்சாவடி மையங்களுக்கு அனுப்பி வைக்கப்பட்டன. இந்தப் பணிகளை மாவட்ட ஆட்சியர் வீர ராகவ ராவ் ஆய்வு செய்தார்.
இதையும் படிங்க:'மாணவர்களைத் தூண்டிவிட்டு பொதுச்சொத்துகளுக்கு சேதம் விளைவிக்கும் திமுக...!'
