வாய்ப்புக் கிடைத்தால் ஓபிஎஸ்சை சந்திப்பேன் - டிடிவி தினகரன்

வாய்ப்பு கிடைக்கும் போது ஓபிஎஸ்சை சந்திப்பேன் என அமமுக பொதுச் செயலாளர் டிடிவி தினகரன் தெரிவித்துள்ளார்.

தஞ்சாவூர்:அமமுக பொதுச் செயலாளர் டிடிவி தினகரன் தஞ்சையில் செய்தியாளர்களுக்கு பேட்டியளித்தார். அப்போது, “பாராளுமன்ற தேர்தலுக்காக அம்மா மக்கள் முன்னேற்ற கழகம் பணிகளை தொடர்ந்து செய்து வருகிறது. இந்த தேர்தலில் அம்மா மக்கள் முன்னேற்ற கழகம் முத்திரை பதிக்கும். பிரதமரை தேர்ந்தெடுக்கும் பணியில் சிறப்பான பணியில் ஈடுபடும்.

அதிமுக தலையில்லா முண்டமாக உள்ளது. எடப்பாடி பழனிச்சாமி ஒருபுறமும், ஓபிஎஸ் ஒருபுறமும் பிரிந்து இருக்கிறார்கள். அவர்கள் இருவரை தான் அதிமுக கட்சி தலைவராக தேர்தல் ஆணையம் நியமித்திருந்தது. தற்போது இது செயல்படாத இயக்கமாக உள்ளது.

நான்கு மாதத்திற்குள் பொதுச் செயலாளர் தேர்தல் வைக்காததால், ஈபிஎஸ் இடைக்கால பொதுச் செயலாளர் என்று சொல்வது தவறு. வாய்ப்பு கிடைக்கும் போது பன்னீர்செல்வத்தை சந்திப்பேன்” என கூறினார்.

தொடர்ந்து பேசிய அவர், “கருணாநிதி குடும்பம் எப்போதெல்லாம் ஆட்சிக்கு வருகிறதோ, அப்போதெல்லாம் ஆக்டோபஸ் போல் எல்லா துறைகளிலும் நுழைந்து தங்கள் குடும்பம் தான் இருக்க வேண்டும் என்ற நிலையை உருவாக்கி உள்ளனர்.

தயாரிப்பாளர்கள் இவர்கள் சொல்லும் தேதியில் தான் படத்தை ரிலீஸ் செய்ய வேண்டும். இவர்கள் சொன்னால் தான் ரிலீஸ் செய்ய வேண்டும். ஒரு சர்வாதிகாரம் போல் செயல்பட்டு வருகின்றனர். உண்மையாக ரெட் ஜெயன்ட் நிறுவனம் அரக்கனாக செயல்பட்டு வருகிறது. இதற்கு விரைவில் நல்ல முடிவு கிடைக்கும்” என்று தெரிவித்தார்.