திருமணச் செலவுக்காக திருட்டில் ஈடுபட்ட நபர் கைது!

Thanjavur Gold theft: தஞ்சையில் பட்டப்பகலில் பள்ளி ஆசிரியை மற்றும் கல்லூரி விடுதி வார்டன் வீட்டில் பூட்டை உடைத்து மொத்தம் 60 பவுன் நகைகளை திருடிச் சென்ற நபரை போலீசார் கைது செய்துள்ளனர்.

தஞ்சாவூர்:தஞ்சை புதிய வீட்டு வசதி வாரிய குடியிருப்பு பகுதியில் வசித்து வருபவர், கீதா. ஆசிரியையான இவர், கடந்த டிசம்பர் 20ஆம் தேதி காலை வழக்கம்போல் தனது மகளுடன் வீட்டை பூட்டிவிட்டு பள்ளிக்குச் சென்றுள்ளார். இந்த நிலையில், மர்ம நபர் ஒருவர் வீட்டின் கதவு மற்றும் பீரோவை உடைத்து, 48 பவுன் நகை மற்றும் 10 ஆயிரம் ரூபாயை திருடிச் சென்றுள்ளார்.

பள்ளி முடிந்து மாலை வீட்டிற்கு வந்த கீதா, வீட்டின் கதவு உடைக்கப்பட்டு நகைகள் திருட்டு போயுள்ளதைக் கண்டு அதிர்ச்சியடைந்துள்ளார். பின்னர், உடனடியாக காவல் நிலையத்திற்கு தகவல் கொடுத்த நிலையில், தஞ்சை மாவட்ட காவல் கண்காணிப்பாளர் ஆஷிஷ் ராவத் உத்தரவின் பேரில், தனிப்படை அமைக்கப்பட்டு தீவிர விசாரணை நடத்தப்பட்டுள்ளது.

மேலும், தனிப்படை போலீசார் புதிய வீட்டு வசதி வாரிய குடியிருப்பு பகுதியில் உள்ள கண்காணிப்பு கேமராவில் பதிவான காட்சிகளை ஆய்வு செய்து விசாரணை மேற்கொண்டனர். விசாரணையில், தஞ்சை நாஞ்சிக்கோட்டை சாலை சித்ரா நகரைச் சேர்ந்த வெங்கடேசன் (33) என்பவர், இந்த திருட்டுச் சம்பவத்தில் ஈடுபட்டது தெரிய வந்துள்ளது. அதைத் தொடர்ந்து தனிப்படை போலீசார், வெங்கடேசன் வீட்டிற்குச் சென்று அவரைக் கைது செய்துள்ளனர்.

இந்நிலையில் வெங்கடேசனிடம் போலீசார் விசாரணை மேற்கொண்டதில், நகை மற்றும் பணத்தை திருடியதை ஒப்புக்கொண்டு, திருடிய நகைகளை வீட்டில் பதுக்கி வைத்துள்ளதாக தெரிவித்துள்ளார். மேலும், கடந்த ஆயுதபூஜை அன்று தஞ்சை சரபோஜி கல்லூரியில் வார்டனாக பணியாற்றும் ஆறுமுகம் என்பவரின் வீட்டில் இருந்து, 12 பவுன் நகை மற்றும் வெள்ளிப் பொருட்களை திருடியதும் வெங்கடேசன் என தெரிய வந்துள்ளது.

இதையடுத்து, வெங்கடேசன் வீட்டில் இருந்த 60 பவுன் நகை, வெள்ளிப் பொருட்கள், ஏடிஎம் கார்டு போன்றவற்றையும் போலீசார் பறிமுதல் செய்துள்ளனர். பின்னர், வெங்கடேசனை கைது செய்து நீதிமன்றத்தில் ஆஜர்படுத்தி சிறையில் அடைத்தனர். வெங்கடேசனுக்கு தலையில் முடி இல்லததால், தலையில் விக் வைத்துக்கொண்டு திருடியது தெரிய வந்துள்ளது.

மேலும், அவர் கொடுத்த வாக்குமூலத்தில், 33 வயதாகியும் திருமணம் ஆகாமலும், சரியான வேலையும் கிடைக்காமல் இருந்ததால் விரக்தியில் இருந்ததாக அவர் தெரிவித்துள்ளார். மேலும், தன்னிடம் பணம் இல்லாததால்தான் யாரும் பெண் தர மறுக்கிறார்கள், எனவே பணம் சேமிக்க வேண்டும் என நினைத்து திருடுவதற்கான திட்டத்தை தேர்வு செய்ததாக கூறியுள்ளார்.

இதற்காக பகலில் ஆளில்லாமல் வேலைக்குச் செல்பவர்கள் வீடுகளை நோட்டமிட்டு, திருடும் திட்டத்தை செயல்படுத்தி உள்ளதாகவும், பணத்தை சேர்த்தால் தனக்கு பெண் தருவார்கள் என நினைத்து திருடி உள்ளதாகவும், தான் திருடிய நகைகளை வீட்டிலேயே பதுக்கி வைத்து பணத்தை மட்டும் செலவு செய்துள்ளார் என போலீஸ் விசாரணையில் தெரிய வந்துள்ளது.

இதையும் படிங்க:நாகை போலீசாரின் அதிரடி ஸ்ட்ராமிங் ஆபரேஷன்.. ஒரே நாளில் 85 நபர்கள் அதிரடி கைது!