'தகவல் தொழில்நுட்பத்தில் தமிழ்நாடு சிறந்து விளங்க முயற்சி' - ஆர்.பி. உதயகுமார்

தென்காசி: இந்தியாவில் தமிழ்நாடு தகவல் தொழில்நுட்பத்தில் சிறந்து விளங்கக்கூடிய முயற்சியில் ஈடுபட்டுவருவதாக தகவல் தொழில்நுட்பவியல் துறை அமைச்சர் ஆர்.பி. உதயகுமார் தெரிவித்துள்ளார்.

தென்காசி மாவட்டம் மத்தளம்பாறையில் இயங்கும் தனியார் மென்பொருள் நிறுவனத்தில் அமைச்சர் ஆர்.பி. உதயகுமார் தலைமையில் கலந்தாய்வுக் கூட்டம் நடைபெற்றது. இக்கூட்டத்தில் ஆதிதிராவிடர் நலத் துறை அமைச்சர் ராஜலட்சுமி, மாவட்ட ஆட்சியர் அருண் சுந்தர் தயாளன், சட்டப்பேரவை உறுப்பினர்கள் உள்ளிட்டோர் கலந்துகொண்டனர்.

இதனைத் தொடர்ந்து செய்தியாளர்களிடம் அமைச்சர் ஆர்.பி. உதயகுமார், "தகவல் தொழில்நுட்பத்தில் கிராமப்புற இளைஞர்கள் சிறந்து விளங்க வேண்டும் என்ற முயற்சியில் ஜோஹோ (zoho) என்னும் தனியார் மென்பொருள் நிறுவனம் செயல்பட்டுவருகிறது.

தகவல் தொழில்நுட்பத்தில் அமெரிக்கா, கலிஃபோர்னியாவில்தான் வேலைவாய்ப்பு என்ற நிலையை மாற்றி இங்கிருந்து அந்த வேலைகளைப் பெறும் முயற்சியில் ஈடுபட்டுவருகிறது. அதற்கு தமிழ்நாடு அரசு உறுதுணையாக இருக்கும்.

இந்தியாவில் தமிழ்நாடு தகவல் தொழில்நுட்பத்தில் சிறந்து விளங்கக்கூடிய முயற்சியில் அரசு ஈடுபட்டுவருகிறது. அதற்கு இந்தக் கலந்தாய்வுக் கூட்டம் உறுதுணையாக இருந்துள்ளது.

தென்காசியில் மாவட்ட ஆட்சியர் அலுவலகக் கட்டடம் இடம் தேர்வு பணிதான் நடந்துகொண்டிருக்கிறது. இன்னும் இடமானது முடிவு செய்யப்படவில்லை.

பொதுமக்கள் விரும்பக்கூடிய இடத்தில் மட்டுமே மாவட்ட ஆட்சியர் அலுவலகம் வரும். வரக்கூடிய சட்டப்பேரவைத் தேர்தலில் அதிமுகவின் வெற்றி பிரகாசமாக உள்ளது" எனத் தெரிவித்தார்.

இதையும் படிங்க: விலையில்லா நாட்டுக் கோழிக்குஞ்சுகளை வழங்கிய அமைச்சர்!