ரூ.10 கோடி மதிப்புள்ள நிலங்கள் மீட்பு: தென்காசி எஸ்.பி கிருஷ்ணராஜ்

2022-ல் நில அபகரிப்பு தடுப்பு சிறப்பு பிரிவு காவல் துறையினர் முயற்சியில் சுமார் 10 கோடி மதிப்புள்ள நிலங்கள் மீட்கப்பட்டுள்ளதாக தென்காசி மாவட்ட காவல் கண்காணிப்பாளர் கிருஷ்ணராஜ் தெரிவித்துள்ளார்.

தென்காசி: நாளை புத்தாண்டு தினம் கொண்டாடப்பட இருப்பதால் தென்காசி மாவட்டத்தின் முக்கிய பகுதி முழுவதும் அசம்பாவித சம்பவங்கள் நடைபெறாமல் தடுக்க பலத்த காவல் பாதுகாப்பு போடப்பட்டுள்ளது.

தென்காசி மாவட்ட காவல் கண்காணிப்பாளர் கிருஷ்ணராஜ் பத்திரிகையாளர்களிடம் கூறியது; "புத்தாண்டு தினத்தை முன்னிட்டு மாவட்டத்தின் பல இடங்களில் 34 சோதனை சாவடிகள் அமைக்கப்பட்டுக் கண்காணிப்பு பணிகள் நடைபெற்று வருவதாகவும், மாவட்டத்தில் உள்ள 280 கிறிஸ்தவ தேவாலயங்களுக்குச் சிறப்பு பாதுகாப்பு போடப்பட்டுள்ளதாகவும் மொத்தமாக 781 காவலர்கள் பாதுகாப்புப் பணியில் ஈடுபட்டு வருவதாகவும் தெரிவித்தார்.

மேலும் இந்த ஆண்டு நில அபகரிப்பு தடுப்பு சிறப்புப் பிரிவு காவல் துறையினரின் முயற்சியால் மாவட்டத்தில் போலி ஆவணம் மூலம் விற்கப்பட்ட சுமார் 10 கோடியே 81 லட்சம் மதிப்புள்ள 22.14.5 ஏக்கர் நிலங்கள் மீட்கப்பட்டு உரிமையாளர்களிடம் ஒப்படைக்கப்பட்டுள்ளதாகத் தெரிவித்தார்.

சைபர் கிராம் காவல் நிலையத்தின் மூலம் பல்வேறு காவல் நிலையங்களில் செல்போன் காணாமல் போனதாக மற்றும் தவற விட்டதாக பெறப்பட்ட புகார் மனுக்களில் ரூ.28 லட்சம் மதிப்பிலான 185 செல்போன்கள் மீட்கப்பட்டு உரிய நபரிடம் ஒப்படைக்கப்பட்டுள்ளது. ஆன்லைன் மூலம் பண மோசடி செய்யப்பட்ட வழக்குகளில் சைபர் குற்றவாளிகளின் வங்கி கணக்குகளில் உள்ள ஒரு கோடியே 23 லட்சத்து 66 ஆயிரத்து 711 ரூபாய் முடக்கப்பட்டுள்ளதாகத் தெரிவித்தார்.

இதில் ரூ.15 லட்சத்து 68 ஆயிரத்து 245 மீட்கப்பட்டு உரியவர்களிடம் ஒப்படைக்கப்பட்டுள்ளது. இந்த ஆண்டு கொலை கற்பழிப்பு மற்றும் போக்சோ வழக்கின் குற்றவாளிகள் 11 நபர்களுக்குத் தென்காசி மாவட்ட காவல்துறையின் முயற்சியில் நீதிமன்றம் மூலம் வாங்கி கொடுக்கப்பட்டுள்ளது என்றும் தெரிவித்தார்.

மாவட்டத்தில் சட்டவிரோதமாகக் கஞ்சா விற்பனை செய்த வழக்கில் இதுவரை 125 வழக்குகள் பதிவு செய்யப்பட்டு 200 பேர் கைது செய்யப்பட்டுள்ளனர். அவர்களிடம் இருந்து ரூ.7,71,180 மதிப்புள்ள 77.12 கிலோ கஞ்சா பறிமுதல் செய்யப்பட்டுள்ளது. மேலும் கஞ்சா வழக்கில் தொடர்புடைய 62 நபர்களின் வங்கிக் கணக்குகள் முடக்கப்பட்டுள்ளதாகவும் கூறினார்.

இந்த ஆண்டு தடை செய்யப்பட்ட புகையிலை பொருட்கள் கடத்தல் மற்றும் விற்பனை செய்தல் போன்றவை குறித்து 557 வழக்குகள் பதிவு செய்யப்பட்டு சுமார் 46 லட்சத்து 34 ஆயிரத்து 837 ரூபாய் மதிப்புள்ள 7963 கிலோ புகையிலை பொருட்கள் கைப்பற்றுள்ளது. புகையிலை விற்பனை செய்த 61 கடைகளுக்குச் சீல் வைக்கப்பட்டு ரூ.3 லட்சத்து 45 ஆயிரம் அபராதம் விதிக்கப்பட்டுள்ளது" என மாவட்ட காவல் கண்காணிப்பாளர் கிருஷ்ணராஜ் தெரிவித்தார்.