காளை வடிவில் கொழுக்கட்டை.. ருசியான கருவாடு படையல் - அம்மனுக்கு வினோத வழிபாடு!

மானாமதுரையில் ஜல்லிக்கட்டு காளை வடிவில் கொழுக்கட்டை வைத்தும், ருசி மிகுந்த கருவாடு வைத்தும் அம்மனுக்கு வினோத வழிபாடு நடத்தப்பட்டது.

சிவகங்கை மாவட்டம் மானாமதுரை அருகேயுள்ள கட்டிக்குளம் கிராமத்தில், 50 ஆண்டுகளுக்கும் மேலாக அழகிய சவுந்திர நாயகி அம்மனுக்கு கிராமத்து பெண்கள் அசைவ உணவுகளை சமைத்து படையல் வைத்து வழிபாடு செய்து வருகின்றனர். இந்த வகையில், இங்குள்ள 200 க்கும் மேற்பட்ட பெண்கள், தங்கள் வீடுகளில் இருந்து விநாயகர், மனித பொம்மை, ஜல்லிக்கட்டு காளை, குடை உள்ளிட்ட பல்வேறு வடிவங்களில் கொழுக்கட்டைகளை எடுத்து வந்தனர்.

மேலும் கறி, மீன், கருவாடு, முட்டை போன்ற அசைவ உணவுகளையும் சமைத்து பாரம்பரியம் மாறாமல் ஓலைப் பெட்டியில் வைத்து கொண்டு வந்தனர். தொடர்ந்து, இந்த ஓலைப்பெட்டியோடு விளக்குகளை கிராமத்தின் முக்கிய வீதிகள் வழியாக ஊர்வலமாக எடுத்து வந்தனர்.

பின்னர், அழகிய சவுந்திர நாயகி அம்மன் கோயிலை சுற்றி வந்து அசைவ உணவுகளை படையல் வைத்து குலவையிட்டு வழிபாடு செய்தனர். அடுத்ததாக, கோயில் பூசாரி வாயை கட்டிக் கொண்டு, பெண்கள் கொண்டு வந்த அசைவ உணவுகளை அம்மனுக்கு படையலுக்காக எடுத்து வைத்தார். பின்னர் அம்மனுக்கு சிறப்பு பூஜைகள் நடைபெற்றது. இதனைத் தொடர்ந்து, பெண்கள் தாங்கள் கொண்டு வந்த அசைவ உணவுகளை குடும்பத்தில் உள்ள பெண்களுடன் பகிர்ந்துண்டு மகிழ்ந்தனர்.

இதையும் படிங்க:'ஹேப்பி பர்த்டே டூ அகிலா' - கோயில் யானைக்கு 20ஆவது பிறந்தநாள் கொண்டாடிய பக்தர்கள்!