சிவகங்கை:திருப்பத்தூரில் தேசிய முற்போக்கு திராவிட கழகத்தின் மாநில வழக்கறிஞர் அணிச் செயலாளர் எம்.ஆர். பன்னீர்செல்வம் இல்ல திருமண விழாவிற்கு வருகைதந்த பிரேமலதா விஜயகாந்த் கலந்துகொண்டு மணமக்களை வாழ்த்தினார்.
அதனைத் தொடர்ந்து செய்தியாளரைச் சந்தித்த பிரேமலதா பேசுகையில், "உள்ளாட்சித் தேர்தலில் தமிழ்நாடு முழுவதும் தேமுதிக தனித்துப் போட்டியிடுகிறது. ஆட்சி பலம், அதிகார பலம், பண பலத்தை எதிர்த்து தனியாகப் போட்டியிடுகிறோம்.
பெரிய ஆதரவு எங்களுக்கும், கேப்டன் விஜயகாந்திற்கும் எங்கள் கட்சி வேட்பாளருக்கும் பொதுமக்கள் ஆதரவு கொடுப்பார்கள் என்று உறுதியாக நம்புகிறோம். திமுக ஆட்சிக்கு வந்து ஒன்பது மாதங்கள் ஆகியும் மக்களுக்குக் கொடுத்த வாக்குறுதிகள் எதையும் நிறைவேற்றவில்லை என்ற குற்றச்சாட்டு தமிழ்நாடு முழுவதும் இருக்கிறது.
கேட்டால் உறுதியான பதில் எதுவும் இல்லை கூறாமல், சிரித்து மழுப்புகின்றனர். நீட் விவகாரத்தை வைத்து திமுகவும், அதிமுகவும் அரசியல் செய்கிறார்கள். மக்களை குழப்புவதற்கும், அரசியல் ஆக்குவதற்கும் நீட் விவகாரத்தை கையில் எடுத்துள்ளனர். ஹிஜாப் விவகாரத்தில் தேமுதிகவின் ஆதரவு அந்தப் பெண்ணிற்கு உண்டு, இருந்தாலும் கல்வி பயிலும் இடத்தில் மதம் வேண்டாம் என்பது எங்களது நிலைப்பாடு" என்றார்.