மாநில அளவிலான பெண்கள் கபடி போட்டி: ஒட்டன்சத்திரம் அணி சாம்பியன்

மாநில அளவிலான பெண்கள் கபடி போட்டியில் ஒட்டன்சத்திரம் SMVKC அணி வெற்றிபெற்று, சாம்பியன் கோப்பையும், ஒரு லட்ச ரூபாய் ரொக்கப் பரிசும் பெற்றது.

சிவகங்கை: சிங்கம்புணரியில் தமிழ்நாடு முதலமைச்சர் ஸ்டாலினின் 69ஆவது பிறந்தநாளை முன்னிட்டு மகளிருக்கான மாநில அளவிலான கபடி போட்டி நடைபெற்றது. சிங்கம்புணரி, திருப்பத்தூர், மதுரை, ஒட்டன்சத்திரம், கோபிசெட்டிபாளையம், உசிலம்பட்டி, சென்னை என தமிழ்நாடு முழுவதும் இருந்து 13 அணிகள் பங்கேற்றன.

போட்டியினை தமிழ்நாடு ஊரக வளர்ச்சித் துறை அமைச்சர் கே.ஆர்.பெரியகருப்பன் கலந்துகொண்டு தொடங்கி வைத்தார். இரண்டு நாள்களாக மின்னொளியில் நடைபெற்ற இப்போட்டியினை, சுற்றுவட்டாரப் பகுதியில் இருந்து ஆயிரக்கணக்கான ஆண்களும், பெண்களும் உற்சாகமாக கண்டுகளித்தனர்.

விறுவிறுப்பாக நடைபெற்ற இறுதிப்போட்டியில் ஒட்டன்சத்திரத்தை சேர்ந்த SMVKC அணியும், கோபிசெட்டிபாளையத்தை சேர்ந்த PKR அணியும் மோதின. இதில் 26-22 என புள்ளிகள் கணக்கில் ஒட்டன்சத்திரம் SMVKC அணி அபார வெற்றிபெற்று சாம்பியன் கோப்பையும், ஒரு லட்ச ரூபாய் ரொக்கப் பரிசும் பெற்றது. மேலும் முதல் நான்கு இடங்களைப் பிடித்த அணிகளுக்கு கோப்பையும், ரொக்கப் பரிசும் வழங்கப்பட்டது.

இதையும் படிங்க: 'பொதுத்தேர்வு எழுதும் மாணவர்களுக்கான செய்முறைத்தேர்வு தொடங்கியது'