பட்டப்பகலில் ஆட்டோ ஓட்டுநர் ஓட ஓட வெட்டிக் கொலை

சிவகங்கை: பட்டப் பகலில் ஆட்டோ ஓட்டுநர் ஒருவரை அடையாளம் தெரியாத நபர்கள் ஓட ஓட விரட்டி வெட்டிக் கொலை செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

சிவகங்கை மாவட்டம் சீபி காலனியைச் சேர்ந்தவர் ஆட்டோ ஓட்டுநர் கண்ணன் (27). இவர் இன்று பிற்பகல் 12 மணி அளவில் திருப்பத்தூர் சாலையில் உள்ள இலந்தன்குடிபட்டி கண்மாய் அருகே ஆட்டோவில் அமர்ந்து செல்போன் பேசிக் கொண்டு இருந்தார்.

அப்போது அங்கு வந்த அடையாளம் தெரியாத நபர்கள் சிலர் ஆட்டோ ஓட்டுநர் கண்ணனை வெட்ட முயன்றனர். இதனையடுத்து கண்ணன் கண்மாய்க்குள் இறங்கி ஓட ஆரம்பித்தார். ஆனால் அவரை விடாமல் துரத்தி வந்த அந்தக் கும்பல் கண்ணனை உடலின் பல்வேறு இடங்களில் சரமாரியாக வெட்டினர். இதில், கண்ணன் சம்பவ இடத்திலேயே ரத்த வெள்ளத்தில் துடிதுடித்து இறந்தார்.

இதனைக் கண்ட பொதுமக்கள் சிவகங்கை காவல் துறையினருக்கு தகவல் அளித்தனர். சம்பவ இடத்திற்கு விரைந்த காவல் துறையினர் கண்மாய்க்குள் கிடந்த கண்ணனின் உடலை கைப்பற்றி சிவகங்கை மருத்துவக் கல்லூரி மருத்துவமனைக்கு உடற்கூறாய்வுக்காக அனுப்பிவைத்தனர்.

பட்டப்பகலில் இளைஞர் ஒருவரை அடையாளம் தெரியாத கும்பல் ஓட ஓட விரட்டி வெட்டி கொடூரமாக கொலை செய்த சம்பவம் அப்பகுதி மக்களை அச்சத்தில் ஆழ்த்தியுள்ளது.