சேலம் ரயிலில் தொடர் கொள்ளை: டிஜிபி சைலேந்திர பாபு ஆலோசனை

சேலம்: சேலம் ரயிலில் தொடர் கொள்ளை நடைபெறுவது தொடர்பாக ரயில்வே டிஜிபி சைலேந்திர பாபு தலைமையில் ஆலோசனை நடைபெற்றது.

ஈரோட்டில் இருந்து சேலம் செல்லும் ரயிலில் கடந்த சில தினங்களாகவே தங்க நகைகள், பொருட்கள் என கொள்ளைச் சம்பவங்கள் நடைபெறுவது வாடிக்கையாகிவருகிறது.

இந்த நிலையில், இதற்கு ஒரு முற்றுப்புள்ளி வைப்பது தொடர்பாக ரயில்வே டிஜிபி சைலேந்திரபாபு தலைமையில் அஸ்தம்பட்டியில் உள்ள பயணியர் மாளிகையில் ஆலோசனைக் கூட்டம் நடைபெற்றது.

இக்கூட்டத்தில், டிஐஜி பாலகிருஷ்ணன், காவல் துணை ஆணையர் தங்கதுரை, ரயில்வே காவல்துறை உயர் அலுவலர்கள் உள்ளிட்டோர் கலந்துகொண்டனர்.

மேலும், இதுபோன்ற கொள்ளை சம்பவங்களில் வடமாநிலங்களைச் சேர்ந்தவர்களே பெரிய அளவில் ஈடுபடுவதாக முதற்கட்ட விசாரணையில் தெரியவந்துள்ளதாக காவல்துறை வட்டாரத் தகவல்கள் தெரிவிக்கின்றன.