தமிழ்நாடு, புதுச்சேரியில் மக்களவைத் தேர்தல் ஏப்ரல் 18-ஆம் தேதி நடைபெற்றது. இதனிடையே வாக்கு எண்ணிக்கை நாளை(வியாழக்கிழமை) காலை 8 மணிக்கு தொடங்குகிறது.
சேலம் மக்களவைத் தொகுதி வாக்கு இயந்திரங்கள், வாக்கு எண்ணும் மையமான கருப்பூர் அரசு பொறியியல் கல்லூரியில் பாதுகாப்பாக வைக்கப்பட்டுள்ளன. சேலம் மக்களவைத் தொகுதி ஓமலூர், எடப்பாடி, சேலம் மேற்கு, சேலம் வடக்கு, சேலம் தெற்கு, வீரபாண்டி ஆகிய ஆறு சட்டமன்ற தொகுதிகளை உள்ளடக்கியதாகும்.
ஒவ்வொரு சட்டப்பேரவை தொகுதிக்கு 14 மேஜைகள் அமைக்கப்பட்டு ஒரு சுற்றுக்கு 14 வாக்குப்பதிவு இயந்திரங்கள் எண்ணப்படும். குறைந்தபட்சம் 20 சுற்றுகளிலிருந்து அதிகபட்சமாக 25 சுற்றுகள் வரை வாக்குகள் எண்ணிக்கை நடைபெறும் என்று தெரிகிறது .
பாதுகாப்பு பணியில் 1300-க்கும் மேற்பட்ட போலீசார் வாக்குப்பதிவு இயந்திரங்களில் பதிவான வாக்குகள் எண்ணிக்கை முடிவுற்ற பின்னர் ஒவ்வொரு சட்டப்பேரவைத் தொகுதிகளிலும் குலுக்கல் முறையில் ஐந்து விவிபேட் கருவிகளை தேர்வு செய்து யாருக்கு வாக்களித்தோம் என்பதை உறுதி செய்யும் ரசீது எண்ணும் பணியும் நடைபெறும். வாக்கு எண்ணும் பணியில் 1500 க்கும் மேற்பட்ட அலுவலர்கள் ஈடுபட்டுள்ளனர்.
இதனிடையே வாக்கு எண்ணும் மையத்திற்கு மத்திய ஆயுதம் ஏந்திய பாதுகாப்பு படையினர், மாவட்ட ஆயுதப்படை காவல்துறையினர், மாநகர காவல்துறையின் காவலர்கள் அடங்கிய மூன்று அடுக்கு பாதுகாப்பு போடப்பட்டுள்ளது. மாநகர காவல் ஆணையர், துணை ஆணையர்கள், உதவி ஆணையர்கள், ஆய்வாளர்கள் ,உதவி ஆய்வாளர்கள் என்று 1320 போலீசார் பாதுகாப்பு பணியில் ஈடுபடுத்தப்பட்டு உள்ளனர்.
புறநகர் பகுதிகளில் தேர்தல் முடிவு எதிரொலியாக அசம்பாவிதங்கள் எதுவும் நடைபெறாத வண்ணம் ஆயிரத்துக்கும் மேற்பட்ட போலீசார் மாவட்ட காவல் கண்காணிப்பாளர் தலைமையில் பாதுகாப்பு பணியில் ஈடுபடுத்தப்பட்டு உள்ளனர் என்பது குறிப்பிடத்தக்கது.
