மேட்டூர் அணையின் உபரி நீரை ஏரிகளில் நிரப்பும் திட்டம் - மாவட்ட ஆட்சியர் ஆய்வு!

சேலம்: மேட்டூர் அணை வெள்ள உபரி நீரை நீரேற்று மூலம் ஏரிகளில் நிரப்பும் திட்டத்திற்கான ஆய்வுப்பணிகள் நடைபெற்று வருவதை மாவட்ட ஆட்சித்தலைவர் சி.அ. ராமன் நேற்று ஆய்வு செய்தார்.

சேலம் மாவட்டம் மேச்சேரி எம்.காளிப்பட்டியில் உள்ள ஏரியில் பொதுப் பணித்துறை, நீர்வள ஆதாரத்துறையின் மூலம் மேட்டூர் அணையின் மழைக்கால வெள்ள உபரி நீரை சேலம் மாவட்டத்தின் சரபங்கா வடிநிலத்தில் உள்ள வறண்ட 100 ஏரிகளுக்கு நீரேற்று மூலம் நீர் வழங்கும் திட்டத்திற்கான ஆய்வுப்பணிகள் நடைபெற்று வருவதை, மாவட்ட ஆட்சித்தலைவர் சி.அ. ராமன் நேற்று ஆய்வு செய்தார்.

இதன் பின்னர் செய்தியாளர்களிடம் பேசிய அவர், "தமிழ்நாடு அரசு மேட்டூர் அணையின் வெள்ள உபரி நீரை, சேலம் சரபங்கா வடிநிலத்தில் உள்ள வறண்ட 100 ஏரிகளுக்கு நீரேற்று மூலம் நீர் வழங்கும் திட்டத்தினை அறிவித்து, அதற்காக 565 கோடி ரூபாய் ஒதுக்கீடு செய்துள்ளது.

இத்திட்டத்தின் மூலம் சேலம் மாவட்டத்தில் மேட்டூர், எடப்பாடி, சங்ககிரி மற்றும் ஓமலூர் ஆகியப்பகுதிகளைச் சுற்றிலும் உள்ள விளைநிலங்கள் பயன்பெறும். முதற்கட்டமாக மேட்டூர் அணை வெள்ள உபரிநீரை மேச்சேரி எம்.காளிப்பட்டி ஏரி மற்றும் நங்கவள்ளி ஏரி ஆகிய இரண்டு ஏரிகளில் நீர் நிரப்பி, மற்றப் பகுதிகளில் உள்ள ஏரிகளுக்கு கொண்டு செல்லும் வகையில் திட்டம் திட்டப்பட்டுள்ளது.

இத்திட்டத்தினை நிறைவேற்ற ஓராண்டு அவகாசம் தரப்பட்டுள்ளது. தற்போது திட்டத்திற்கான நில அளவீட்டுப்பணிகள் நடைபெற்று வருகின்றன. 20 நாட்களுக்குள் இந்த அளவீட்டுப்பணிகள் நிறைவடையும். பின்னர் அடுத்த கட்டப்பணிகள் தொடங்கும்.

அற்புதமான இந்தத் திட்டத்திற்கு விவசாயிகள், பொதுமக்கள் என அனைவரும் மிகுந்த வரவேற்பு அளித்துள்ளனர். மேலும், மக்கள் தாங்களாகவே முன்வந்து இத்திட்டம் விரைந்து நிறைவேற்றிட தேவையான அனைத்து உதவிகளையும் செய்வதாகத் தெரிவித்துள்ளனர்" என்றார்.

இதையும் படிங்க:பவானி ஆற்றில் குதித்த இளைஞரை தேடும் பணி தீவிரம்..!