சிறையில் பிளேடால் கழுத்தை அறுத்து தற்கொலைக்கு முயன்ற ரவுடி

சேலம்: மத்திய சிறையில் அடைக்கப்பட்டுள்ள பிரபல ரவுடி பிளேடால் தனது கழுத்தை அறுத்துக் கொண்டு தற்கொலைக்கு முயன்ற சம்பவம் பரபரப்பை ஏற்படுத்தியுள்ளது.

சென்னை அண்ணாநகர் பகுதியைச் சேர்ந்த பிரபல ரவுடி தேவன் பிரகாசம். இவர் மீது கொலை முயற்சி, திருட்டு, அடிதடி உள்ளிட்ட பல்வேறு வழக்குகள் நிலுவையில் உள்ளன. சில மாதங்களுக்கு முன்பு நாமக்கல் மாவட்டம் நாமகிரிப்பேட்டை பகுதியில் நடைபெற்ற கொலை முயற்சி வழக்கில் கைது செய்யப்பட்ட இவர், கடந்த இரண்டு மாதங்களாக விசாரணை கைதியாக சேலம் மத்திய சிறையில் உள்ளார்.

இந்நிலையில், பிளேடால் கழுத்தை அறுத்து தேவன் பிரகாசம் தற்கொலைக்கு முயன்றுள்ளார். பின்னர், கழுத்துப் பகுதியில் காயத்துடன் மீட்கப்பட்ட அவருக்கு சேலம் அரசு மருத்துவமனையில் சிகிச்சை அளிக்கப்பட்டு வருகிறது.

இது குறித்து ரவுடி தேவன் பிரகாஷ் கூறுகையில், சிறையில் உயர் அலுவலர்களுக்கு தெரியாமல் சௌந்தரராஜன் உள்ளிட்ட சிறைக்காவலர்கள் தரக்குறைவாக பேசி அடித்து துன்புறுத்துவதாக குற்றம்சாட்டினார். மேலும், சிறையில் உள்ள தனது நண்பர்களையும் சிறைக்காவலர்கள் தாக்குகின்றனர். எனவே, நியாயம் கிடைக்கும் வரை சிகிச்சை பெற்றுக் கொள்ள மாட்டேன் என்றார்.

இவர் ஏற்கனவே இரண்டு முறை கழுத்தை அறுத்துக் கொண்டு தற்கொலைக்கு முயன்றது குறிப்பிடத்தக்கது.